Ne troverénte ancora nell'aldelà? – Di Cornelio Galas

Da boci i ne feva ‘mparàr a memoria cossa risponderghe ale domande del catechismo.
No te podévi averghe dei dubi. Quel gh’era scrìt sul libro de religióm.
Quel bisognava dir quando el prete el te ciamèva davanti ala lavagna. Po’ qualchedùn l’è nà davera a studiar da prete. O da frà.
No me ricordo tante suore dela me età.
E po’ chi pù chi mèn n’avem fàt de tuti i colori. Sposai do volte.

Zent finìa mal – come se diseva alora – per colpa dele cative compagnie.
O perché – sèmper come se diseva nei ani sesanta-setanta – i era così propri come famèa. Come se no se podès deventàr santi se te gavevi ‘n ppà ‘mbriagòm.
Mi no son mai stà en stinch de sant. Fàt el cieregòt, finì nei scaut, po’ en quei che sonéva en cièsa.
Ma dopo ho molà zò ‘l picòm, come se dis.
Anca perché adès, come tanti, no podo pu far la comuniòm gnanca se stago denter nel confessional ‘na stimàna.

Ho let entant na ‘sbrazàda de libri. Sì, el Vangelo, la Bibia, anca el Corano… tacando da zo ‘n fònt.
E po’ le tradiziòm dei cinesi, dei indiani (anca de quei senza frecie), e libri e poesie tut quel che avria dovù ‘nsegnarme a creder en qualcòs, dopo mort.
Ogni volta che more qualchedun che conosévo, ogni volta che sparìs, da la matina a la sera, n’amico, tiro fora sti tocheti de carta che nei ani ho mess nel cassetìn.
Lezo, rilezo. E me par de dar la testa contro ‘l mur.
Me sento zò, né fodrà né ‘mbastì. E digo semper le stesse robe: Ah me sa che gh’envegnerò fora sol quando la tocherà anca a mi. Ma de là ne troverente ancora?
E chì se tàca via de solit a gratarse la testa con altri penséri.

Per esempi: se de là trovo quel testa de... che m'ha rot le bale per ani, cossa faga?
Se ghe dago na remenàda me màndei via? Me bùtei zo a l'Inferno?
Ma perché alóra a l'Inferno no dovrìa esserghe propri quel che m'ha rot le bale quando ero vìf?
Per caso gh'è anca en Paradìs i racomandai?
E ancora: vòt veder che i me manda quasù per posta le rate dela machina che dovevo ancora pagar prima de l'incidente?
Oscia, gnanca da mort i te lassa star...