Le uniche ròbe stàife che n'è restà – Di Cornelio Galas

Lassàr fòra, longa, la tenda da sol, quando vei en vent che porta via anca le tégole del cuèrt, se no basta. Méterse a vardar na vecia puntata (però mai vista) del tenente Colombo e quando ariva el moment pu bèl, quel ‘n dove i dìs come l’è suzès el delito, dover nar de soto a averzeghe la porta ai suoceri. Nascòrzerse sol… ala fin, che è finì la carta igienica e no gh’è gnanca en toch de giornale vecio vizìn.
 
Prenotàr do posti a zèna, arivàr lì co la nova morosa e véder che denòr gh’è la to ex (che spèta la separazión) co ‘n de n’altro che no t’hai mai conossù.
Arivàr en piscina e capìr sol quando te hai pagà e avèrt l’armadiét che le mudande da bagno te l’hai lassàde a casa ensèma al sugaman.
Telefonarghe a ‘n to vecio amico per véder se ‘l vèi ala festa dei coscriti e capìr sol dopo zinque minuti che te ghe stài proponendo de far ‘na sbaracada a quel che ha sposà, entant, la to vecia sposa.
 
Darghe na ‘bela spolverada de zucher, al posto del sal, ala piza fata en casa, méterla nel forno e sol dopo che l’è zamai pronta averghe ‘n dubi vardando el vasèt…
Zercàr de far pasàr en ciuciòt sul còl per ‘na bota ciapàda dala portèra de la machina quando s’ha apena dìt che i cavéi i è tuti per aria per colpa del motorìn senza parabrza.
 
I «grata e vinzi» che i è semper «grata e perdi».
La pólver scondùa soto i tapèi.
El lat che va per sòra propri quando ariva el scuolabus dei boci.
Le tiràche che se mòla de drio entant che se gh’à le man empegnae.
 
Quel che ciàpa la rotatoria contro man propri quando a ti te se smorza la machina ‘pena nà dénter.
La bòza de spumante da vinti euri che casca per tera su le scale e la bagna ciopéte, formai, tut… quel che gh’era nel sachét de la spesa.
La còa ala Posta.
 
La riletura col Facio Io ala cassa del Poli propri quando per la prima volta no t’hai batù tute le bìre e la sgnapa.
La cerniera enciodàda (en zò) nei gins el dì che te vai dai futuri suoceri.
Le terlarine sul libro che t’ha regalà n’amico… anca tre ani dopo quel compleano.
 
Correr quando te scapa da pissar o… qualcos de pù.
El telefonin... ciàmeme così vedo dove l’ho desmentegà.
Butar su… quando s’è butà massa zo.
 
Le rogne. Che vei sèmper ensema.
Le stagion entréghe. Al posto dele mèze.
I debiti, i mutui, le tasse.
 
El fèstival de Sanremo.