El dolorìm – Di Cornelio Galas

Ah, voi zoveni no gavé de sti penseri. Beati voi. E déghe dentro fin che podé.
Quei de la me età, enveze, i scominzia a ciapar le stremìde.
Te senti en dolorìm tra le costole. Na ròba lei zèrta: non l’è dolori dela crescita come i te diséva da bocia, e sciào.
E alóra te disi: ma sì, sarà el sforzo che ho fat a tirar su la posta dala cassetta che ghè restà dentro la ciaf e diaolpòrco e me mondo sempre i dei a tirar fora le buste che bisogna nar a giustàrla e che la me l’ha dit la sposa anca ieri…
 
No,no… sto dolorim tel senti anca doman, posdomàn, anca quando t’hai giustà la caseta de la posta.
E ancora, e ancora. Ma fate i ragi ai polmoni no? Meio ancora, smeti de fumar… valà.
Come se dis: con do mam no fumo pu. Con una sola sì.
Ma no ghè gnènt da scherzar. Sto dolorim.
Te le pensi tute. Ma no dai, proprio ades, sul pu bel… E na matina te senti mal anca… beh ensoma sóto a quel mister de l’ombrela lì. Sarala la prostata?
 
Entant te vardi i avisi da mort… i scominzia a esser sempre pu vizini a la to età… Come el dis el Guido, «le bombe le casca sempre pù vizine!»
Ma va dal dotor, fate far i esami, dei controli, le analisi… No, no, se ormai l’è la me ora… Ma dai, no sta dir monae. Ghe telefono mi alla cup…
I te fa el ciech ap, i te varda e i te scolta dai cavéi ale ongie dei péi… E te te meti l’anima en paze.
 
No, Marion, lasciami qui, vai avanti tu, hai una vita da vivere. Voglio solo addormentarmi sul tuo seno, baciarti per l’ultima volta… Ah ciao mama, el Cornelio? Che te diga, basta do linee de féver e el straparla…secondo mi el varda massa film de caoboi e indiani…
Ma sì, gò dat zo la tachipirina… ma sì te sai bem come i è i omini de adès… Se i gavés le so robe tuti i mesi come noi… figurete, eco,eco…
«Ciao mama… domam matina no vegno a far la spesa… gò chi sto catorcio en casa… pensa che el vol el prete per l’oi sant… Sì, sì, ah ogni dì pu vecio…sì, come el papà…»
 
…Eh si, te te vardi al spegio. E te vedi entant che la barba l’è semper pu bianca. Che te g’hai le fizze en banda ai oci (ma anca sora, soto, de chi… toh, varda anca de là).
Che la panza la vanza en fora. Che a far le scale te vei i afani.
Che sì, te ghe la fai ancora a sciar ben o mal come na volta. Ma se ghè da nar su a scaleta… te vedi la madona, i ànzoi e anca sant Butete Zò che te dà l’oi sant.
Però, come dir, se torna endrio. A l’età dei puteloti. Non de colpo. Piam, piam.
 
Per esempi te robi i ciocolatini de not al bocia. Te vai al supermercato e t’emboschi do luganeghe fresche da ciuciar en machina.
Dove te gai anca la boceta de profumo per far nar via l’odor de ai.
Te fai le toe. De scondom. Epperò te vedi con oci diversi quel che te g’hai entorno.
Madona, che bel posto che l’è sto chi dove abito.
Pensa che gh’è zent che vei da posti lontani per farghe le ferie. E noi prenotém per chisà dove.
 
Varda che zènt che gira. Ciao Toni, te sarai piém de soldi ma te fai na vita…. E l’altro, daldelà de la strada… Cornelio, farse en piatim de cazi soi no ah?
Te vai al bar dal Giacomo e ‘l sa zà quel che te voi. Ma no l’è sol comodità.
L’è che te ghe voi bem a sti posti dove da zoven te girevi sempre en pressa.
E ades te te fermi. Ostrega, no farò miga la fim de quei pensionai che se ferma davanti ai scavi de l’enel e che ghe dis ai operai:
«Vardè che chi avè zà usà le béne l’am passà… desmentegà qualcos?»