Ciàma i carabinieri... i n'ha robà n'ora – Di Cornelio Galas

E anca stavòlta n'ora l'è nada a farse ciavàr. Sparìa. Dove? E chi èlo che lo sa.
De zert no l'è el caso de zercàrla perché 'l tèmp el córe, diaolpòrco, come 'n léver 'l córe... ciàpelo tì se te sei bom.
Na roba mi no capìso da quando gh'è sti modi de far en par de volte a l'àm. E cioé: en Primavera i te tìra via, ensoma, i te ròba n'ora. E st'ora ciavàda i la ciàma «legale», cioé a posto.
 
L'altra, quela naturale, quela del sól per capirne, quando n'ora en pù ala fim dela féra i te la regàla... no l'è legale.
Che ve diga me vegnirìa vòia de ciamàr i carabinieri per sta fazènda. E domandarghe:
«Scuséme, ma st'ora legale robada stanòt en do la scóndei fim a st'autum?»
E tutmal semper robada l'è. No l'è che se me i la dà de volta pù envanti i me fa en regàl neh... semper robàda al me orolòi l'è stada.
 
I scrive sui giornai, da àni zamai, che tut sto nar envanti e 'ndrìo de le lanciéte de l'orolòi, l'è sól per sparmiar su la luce.
Dirìa: ma credé che sia deventà en vecio bacuco? Le boléte dela luce (e lassèm star quele del gas neh) quando le ariva adès a casa se le averze come se denter quele buste ghe fussa ’na... bomba.
Piam, piam. E le scartofie denter se le gira come quando se zuga a carte, sperando de ciapàr la màta.
Pò, vist i numeri, se fa finta de gnènt, se và nel cièsso, se se séra denter... e se scominzia a sacramentar.
 
Cossa suzéde en ogni caso ancòi? Che anca se de sòlit sé bonorìvi ve vegnirà a mancar n’ora de sòm.
Per dir: tut a l’incontrari de quando l’otóber passà vardàndo l’orolòi avé dit, co na zerta sodisfaziom: «Ma dài, apéna le sète e mèza? Squasi squasi me volto e fàgo n’alter pisolìm».
Eco, quela sodisfaziom ancòi i ve la fà paìr.
En pratica i ve tòl de vòlta quel’ora ‘n pù che se stài nel lèt fim adès.
Resteré (mì de sicur) zidiósi, malmostosi.
E per qualche dì po’ sarà la stessa solfa: «Sì, le l’una de dopodisnàr, ma sarìa però mezdì neh…cossa métit su da magnar che no gò gnanca fàm».
 
Sóm nà demò a ‘nformarme.
Alóra: l’ora legale, quela «a posto» (perché col tèmp quela del sól la dève avérne combinàe tante come na delinquente, se sa) i avéva provà a méterla sui orolòi en Italia zà en temp de guera (sia la prima che l’ultima).
Oddìo, ogni tant i la tiréva via (come i tiréva via anca la corènte) ma disénte che en qualche modo zà en quei ani i avéva scominzià a trapolàr drìo l’orolòi.
 
E l’è da alora che è scominzià i casini. Per esempi gh’è stà en momént che la Republica de Salò, quela dei fascisti, la gavéva n’ora e ‘n zò per l’Italia i ghe n’aveva n’altra.
L’è per quel tra l’alter che i ha becà Musolini: l’avrìa dovù partir n’ora prima per nar en Svizera (dove l’ora legale i ha tacà via a meterla sol nel 1981).
Quando gavévo dése ani i ha fat la lége per l’ora legale: gò 61 ani, fé voi i conti. E zà alora l’era en casìm nàr for dal let per nar a scola propri quando arivéva la primavera e te saréssi stà volentéra soto i linzòi.
 
Se ne vardém ‘ntorno, tut mal, miga tuti i gà la stessa ora su sta tèra. Lassè star i fusi orari de quando né co l’aeroplano de chì o de là.
Per dìr: en Africa (anca da la Tunisia en vìa neh) per esempi no i tìra endrìo o ‘nvanti le lancète: quel l’è ‘l sól, quela l’è so mare.
Tut el dì. E fa calt osc’ia. E alora i làssa star tut come l’è.
 
En Russia, fim al 2014, gh’era l’ora legale tut l’àm.
Po’ i cambià idea: no, mèio l’ora del sól tut l’àm. I gavrà i so perchè.
En Bielorussia i gh’è nài drìo (anca se no… magari arivéva i cararmati).
En Ucraina prima i gà dàt da mént ai russi. Po’ (prima che arivés i cararmati) i ha dìt che l’è forsi meio far come i altri de l’Europa.
Lassèm perder el dormir: adés no ocor meter la sveglia. Ghe pensa i droni e i missili a butarte for dal let.
En Australia – che l’è nela parte pù bàssa del balóm dove vivém – l’è tut viceversa.
Quando da noi gh’è l’ora «a posto» da lori val quela del sol. En Brasile l’ambaradam ‘l gh’è sol da fim otober ala fim de febrèr.
 
Dite ste robe da lezùi mi gò da semper tut mal dei dubi.
Per esempi: tàca via na partìa del balóm co l’ora del sol. E trac, se và ‘nvanti n’ora.
Osc’ia, de colp te sei zà nel secondo tempo no? Eh ma anca chì gh’è la gàbola: no i zùga mai le partìe ale dóe de not… propri per sparagnàr luce, capì come?
O meio, disente che la partìa la dura sol 45 minuti. El primo tempo? Ah le nà a farse ciavàr: sarìa stà squasi meio no zugarlo gnanca.


 
La zonta del Guido.
Ero en Arizona, d’istà. Ero nà a trovar i me amizi indiani, i Navajo, i Hopi e – miga masa amizi – i apache (en trentim apàsc).
Cossa volé, ognun g’ha le sue. Qualche d’um el preferiss nal a Las Vegas, a mi me piaseva nar a trovar i pelerossa...
Beh, tornem al’ora legale.
Gli indiani i teign rigorosamente l’ora del sól. Non gh’è mal de bale.
Però l’Arizona la gh’à l’ora legale e quela solare come noialtri.
Ma la capital, Phoenix (en trentim Fenix), la g’ha la sessa ora de Los Angeles. Perché? Perché i pù i laóra per quei de Los Angeles.
En casìm.
Beh, ero partì da Kayenta (riserva navajo). Ho provà a far i me conti per arivar al’aeroport de Fenix per tèmp.
Arivo lì e i me dis: «No podo embarcarla siór, perché l’aereo e parte tra sei ore».
«Ostia, èlo sì en ritard l’aereo? Cossa el suzèst?»
«No no, l’è tut a post, sior. L’è lu che l’è vegnu sei ore prima.»