Quel che te fài el prim de l'àm... – Di Cornelio Galas

Me vèi en gróp ala gola, adès, a ricordar quel che 'l féva el pòr Giancarlo Angelini, ogni volta el prìm del'am.
Lù, anca e soratut da pensionà, el telefonéva semper en redazióm a l'Adige. Sol per dir: «Quei che laora el prim de l'am... po' i lavora per tut l'àm».
E zó na bela risàda dele sue. Prima de l'altra batùa: «Me racomando neh, laorar per pagarme la pensióm putéi.»
 
Bastéva tutmal quela telefonada, magari anca en biciér enséma pù tardi al bar, per darse l'anda giusta.
E vegnìr a um de na giornada, Capodàm, che de sòlit, en redazióm no l'era propri tra le pù bele de l'am.
Entant perché se doveva tirar su le notizie anca del trentùm dizémber. Zà, no se laoréva l'ultim ma el prim sì.
E alora ocio a no nar nel lèt embriaghi stinchi. O magari tiràr drìt, senza dormir, fim ala matina. Perché zerte sderenàe po' te le paghévi quando gh'era da nar a veder... i primi e i ultimi nati a l'ospedal, quei che s'era brusà coi petardi, quei che era nà for de stràa.
Ensoma tute le miserie dele feste.
 
En prim de l'am però, me ricordo, l'ha scominzià a nar mal de bonóra, disente de prima matina. Ero nà a far festa a Laives, ensema ala me prima sposa.
Sbevazà el giust, piàm col spumante e anca cole sgnape e i amari. Ensoma, m'ero tegnù perché el dì dopo i me spetéva a laoràr a Riva.
Entant che i altri dela compagnia i néva a paióm - beati lóri - mi avévo ciapà la me machinòta. E zò, piam pianél, vers Riva.
Autostrada, uscita Rovereto sud, Mori, Loppio, zó vers Torbole e, passà el bar Mecki, vedo um en mez ala stràa che me fa segn de fermarme.
Cramento, 'sa era suzés? Ciapà fià, sto om, che l'era en tasista, el me spiega che è vegnù zó dal Briom no frana grossa. Che l'è riussì a passarghe oltra co na bòta de cul. E de ciamàr qualchedum... prest demò.
 
No gh'era i telefonini. Alora ho zercà en bar davert: gnent. Tuti zamài a butar fòra i fumi dela festa.
Alora bèco la prima gabina del telefono. Gavévo per fortuna qualche getóm vanzà da l'ultim giro de nera...
Ciamo carabinieri, pompieri. Ghe digo che tra Riva e Torbole è vegnù zó en tòch de Briom...

E po', ala fim, anca se 'n po' stormenì, capìsso na roba: som mi de turno ancòi al giornàl, som mì che devo scriver de sta roba.
Tiro fòra dal bagagliaio la me borsa co la machina per far le foto. No la trovo subit: l'era en méz ale carte dei regai de Nadàl e a botiglie de spumante vòide.
 
E via a far le foto. Da tute le bande. A tor appunti de quel che dis i tecnizi, i carabinieri.
«No, soto no gh'è restà nesum per fortuna.»
Eco, en Capodàm che da quela matina l'è stà en laorar senza n'atimo de tregua.
Fim a sera tardi. Quando gò portà su i rolini da svilupar al Giorgio Rossi.
En quel tràt de stràa i ha fat (miga subit neh) na galeria artificiale. E dopo? Gh'è stà altre frane.
Tra la galerìa naturale e quela artificiale.
Zà, el Brióm ogni tant el se stufa de tegnir su i so sassi. E 'l li spùa vers el lach. Come suzéde anca a Tremosine, adès, propri sora dove vol far la ciclopedonale a sbalz sul Garda.
Forsi l'è el caso de pensarghe, e tant, prima...
 
Bòm, tutmal no l'è miga per portar pégola che ho ricordà 'sti fati. Anzi, auguro a tuti i amizi de l'Adigét, de scominziar pù bém che i pòl sto 2024.
Zà n'altro am. Da bocia no vedévo l'ora de deventàr grant.
Adès, ogni am che passa, se podés tirar... - come co l'orolòi - le lenciéte endrìo, ve dirò che sarìa pù content.
Auguri ancora. E a quei che no soporta le feste: dai che po' ariva l'Epifania che tute le feste la porta via.
Ma gavé fàt caso che nei supermercati i ha zà més fòra i gròstoi de Carneval?