«Auguri, se no dovéssen vedérne pù…» – Di Cornelio Galas

El capiré anca voi, neh, che a sentir ste parole te ven spontaneo de tocarte le bàle…

Sti pochi dì che manca ancora a Nadal i è quei pù... a riscio. Perché no te pòdi nar en giro senza che prima o dopo qualchedùm no’l te diga quele parole zamai famose:
«Ah, tanti auguri a ti e faméa neh. se no dovéssem vederne pù…»
Prové a pensarghe su n'atimìm a cossa che gh'è drio a ste parole.
En pratica l'è come ciamàr le disgrazie. Cioè pensar mal.
Ensoma che um dei dói – ti e quel che te fa sto tipo de auguri – no 'l ghe la faga a passsar fòr vif le feste.
Perché no véderse pù quel en font volerìa dir.
Anca se pòl darse che magari um dei dói el vaga en ferie. O tutmal che no te pòdi pu encontrarlo prima de Nadal e feste de fim de l'am.
 
Ma parte sta roba, che zà te vei voia de tocarte en quel posto, bisogna pensar anca a come risponder a sto tipo de auguri.
Per esempi: «Sì, anca a ti e a la to faméa tanti auguri... se propri no dovéssem vederne pù».
Che no so pù quala dele do frasi la sia pézo a sto punto.
 
Dopo gh'è anca i auguri fati col compiuter.
Che ala fim i è tuti gualivi perché tuti i va a tor le figure nel stés posto.
E cioé: le renne de Babo Nadal, l'alber de Nadal, i fiochi de néf... Per l'ultim de l'àm envéze le botilie de spumante, le trombéte, magari anca al «pepepe pepepepe» en musica per far el trenim.
 
A tute ste tristéze chi bisogna tacàrghe el modo de far dei pù tanti dei trentini.
Soratut quei pu veci.
Perché bisogna rispetar zerti modi de esser, de dir del nos Trentim, oscia.
Ve fago qualche esempi. Quando, en machina, el trentim el vede for dai finestrini de l'auto um che 'l conòs 'sa fàlo? L'alza la mam per saludar?
No, El se ferma e 'l vèi fòra per darghe la mam e far do ciàcere?
No. El trentìm, quel vero neh, de sòlit l'alza de dése zentimetri (non uno en pù, non uno en mém) la mandibola vers l'alt. Come dir: «Te conosso. T'ho vist. Te saludo. Bòm, me par che abia fat assà no?»
Per alzar anca la mam bisogna propri che la machina la deva fermarse perché gh'è el semafori ros. E te devi star lì pù del temp per alzar la mandibola.
 
No l'è che se s'encontra a pè la vaga tant meio neh. Perché el trentìm el par semper ciapà da qualcos che ’l deve far, da 'n posto dove el deve nar.
E alora el te dirà: «Ciao, scùseme sàt, ma som de prèssa. Come te vàla del rest?»
L'altro el scominzia a dir: «Sì dai, no me lamento...»
Ma quando l'ariva a «ento» l'amico l'è zà vinti metri lontàm.
E 'l te dirà, come prima de Nadàl: «Tanti saluti anca a casa».
 
La roba pu bruta che se pol augurarghe a 'n trentìm l'è quela de trovarse su na coriera che la se ferma ogni zinquanta metri.
E de averghe sentà propri davanti al nàs l'amico che no se vedéva da 'n pèz. Perché a quel punto no te pòi miga dir de averghe pressa de nar, Lì te sei e lì te devi star, cramento.
L'è en quei momenti lì che al trentìm ghe vèi en ment de quando l'avrìa podù cromparse na machinota de quele che va bem per nar en zità. Oscia, l'era anca en promoziom.
E lù enveze el gavéva dit ala sposa che con quei soldi l'avria podù nar e vegnir tut el di co la coriera...

Fato sta che enciodà da quela situaziom el zercherà de tirar fora el telefonim per far finta de ciamàr qualchedum.
E sol en quel moment ghe vegnirà en ment de averlo desmentegà a casa...