Quando la dieta la... te scampa – Di Cornelio Galas

Mi ghe narìa drìo, ensoma seguirìa la dieta. L'è la dieta che sèita a scamparme...

Ghe l'ho dìt l'ultima volta al me nutrizionistra, sì ensoma al dotor che dovrìa darme la drita per farme dimagrir.
Mi ghe narìa drìo, ensoma la seguirìa la dieta. L'è la dieta che sèita a scamparme...
Zà, perché no ero cosìta da zóven. Anzi, ero màgher empicà.
Tanto che ala prima visita per la naja i m'aveva fàt rivedibile. Perché no gavévo la circonferenza giusta, capìset come?

En pratica, de faméa neh, èrem tuti dei... bachéti. Da me nono en zó, per dir. Anca per el fato che no gh'era tant da magnar sul tàol.
E per noi bociéti l'era giust na festa granda quando, per la prima comunióm, per i compleani de qualchedum, finì de disnàr i metéva zó sula tovaia i piatini per la torta.
 
O quando el zio Luigino el portéva el sachedèl con dénter i ovéti de ciocolata. Che po' se dovéva spartir tra tre fradéi, se sa.
E l'è del rest lì che avém scominzià a begàr.
Ma cossa se magnéva en quei ani da poder restar... così sùti? Me ricordo che me nona la ne féva quele che le ciaméva «svizerine».
En pratica carne de masnada tuti i tipi (vanzaròti pu che àlter). E po' messa en sesto come i hamburger.
Con una de quéle – stàifele – ensema a 'n tòch de pam magari vanzà dal dì prima, t'eri a posto almém fim a merenda. Dove, se no l'era stagiom de pomi, l'era quela dele nosèle neh.
 
De solit la doménega la néva envéze de polenta. Col pocio, se sa, de qualcós.
Col formài gratà («Basta, oscia, che deve magnar anca i altri).
Dele volte anca col zucher. O col làt. Quel che contéva l'era la polenta. Che – diséva la nona – no se pòl magnar tuti i dì perché se no ve vei la pelagra come suzedéva a noi en temp de guera.
Ah, finìda la polenta bastéva spetàr qualche oréta. E l'era giust el temp per magnar le... groste. Che bone.
Meio de quele che i vende adés nele buste. Anca per el fato che quel che 'l savéva gratàr meio el paròl el le magnéva pù grande.
 
El vendro la néva de... gnochi (no el zòbia, come i dis quei che no sa gnènt).
Che bel robàr quei apena fàti e gnancora messi en padela. I savéva en po' de farina ma... i néva zó che i se copéva. Almem fim quando la nona no la se scorzéva che 'n machéva massa rispèt a quei che l'aveva més sul tàol.
 
Per no parlar dei gnochi de brugna, ala boema. Che sèmper la nona l'aveva emparà a far quando i li aveva portài col treno en quei posti.
Gnochi grossi. Con denter la canèla e la brugna. E anca ciodi de garofano. En bastéva um per sentirse a posto.
 
Pò gh'era quele domeneghe che ariveva nela cort i cazadóri. Con sul cofano dela machina el capriol apena copà.
Diré: che schifo. El so, pòra bestia. Ma vot meter el spezatim de capriol co la polenta? Te nevi a dormir anca prima de Caroselo. E content. Tés.
 
Così come l'era na festa quando ariveva, col so bel prosàch, el Massimo dela Malga. Col buro, col formai.
E che dir de quéla volta che me nono – marangóm – l'aveva fat el mobilio dela cosina de na famea de contadini? I l'aveva pagà con tante colane de salsize.
Che gavévem squasi paura de far dei sogni quando le avem viste tacàe su en cantina...
 
Eco, adés a forza de parlar de magnari m'è vegnù fàm, cramento. Vago a vardar se gh'è qualcos en frigo.
Ah, se vedé la me dieta en giro féme en fiscio. Così anca stavolta la lasso scampar...