Sém zamài ala càna del gas – Di Cornelio Galas

Costa zamài tut de pù... Anca la legna, per quei che penséva de tràrse envanti

La pù bèla? L'ho lèta en sti di chì su Feisbuch. L'è a proposit del tet al prezzo del gas che l'Europa la vòl méter a quel che ariva coi tubi da Russia. De sòlit – l'ha scrit um – l'è quel che vende che stabilìs le regole e no quel che crompa. Perché alóra vago anca mi domam da quel che vende le machine e ghe digo: «Vintizinquemili euri per st'auto chi? No, caro, fém al massimo desemili valà... Se no tègnetela.»
 
El fato l'è però che no se pòl dirghe ai russi de tegnìrse el so gas.
Perché senza quel gas va tut dal balóm su drit.
Anzi, sém zà en pratica ala càna del gas, se l'è per quel vist che costa zamài tut de pù... Anca la legna e el pellets, per quei che penséva de tràrse envanti.
 
L'alter dì, per dir, ho vist en me amico che 'l neva en banca co na bombola grossa de gas sula spala.
Pò l’è vegnù fòra e poch dopo l'è tornà de nof, stavolta co na cariola piena de bombolete de gas, quele picole, che se dropa per el campegio.
L'ho spetà de fòra e g’ho dit: «Tèi, ma 'sa fàt su po'?»
«Tasi valà, i m'ha dit che la bombola granda no la ghe stéva nele casète de sicureza...»
A 'n distribudor ho sentì co le me recie um che diséva a quel che ghe domandéva quant che el voleva far de benzina: «Svòideme el portafoi valà envéze che farme el pieno dela machina».

N'altra roba: no gh'è pù la lège sula praivasi.
Tanti i méte la so boléta del gas anca sui giornai o tacàda fòra dale boteghe, dai bar. Squasi come n'autocertificaziom no per el covid ma per come la và de magra.
Ensóma, sem méssi mal. Propri mal.
E gh'è tra l'alter anca le elezióm en mèz. Cosita no te poi gnanca tòrtela col governo. Che l'è en vivéta.
 
Tut mal i sèita a dirne che l'è meio crompàr maióni per st'autum e soratùt per l'inverno.
Perché se podrà scaldar i termosifoni ma sol fim quando i deventa tèpidi.
E po' ocio neh che se i ve trova a scaldarve co na botilia de vodka... riscé de finir en casini ancora pu grossi.
 
Gh'è per la verità anca tanti gufi en sto moment. Come el me vizim de casa che el sèita a dirme: «Te te lamentévi dela calura? Te vedrài che st'inverno te rimpianzerài sti mesi de afa...».
E mi: «Varda che no l'è dita che finìssa come te dìsi ti. I dìs che la tera la se sta scaldando semper de pù.
«Che se cóla le giazère dei monti. E alora se ogni tant farà do gozze o vegnirà a nevegàr, dai, podrìa anca esser en solievo no?»