Ma 'n che mondo vivénte? – Di Cornelio Galas

Quando ne trovém al bar, tra pòri veciòti zamài, a parlar del pù e del mém, par squasi che no ghe sia pù na fim ale miserie de 'sto mondo.
Per dir: na volta se beghéva per le sviste dei arbitri nele partìe del balóm, sul governo (semper ladro, se sa, anca quando no’l pioveva), o su quei che laséva la sporcaria en mèz ala piaza. Monae, ensoma.

Da quando è vegnù fòra la storia del covid - dis envéze sèmper l'Ernesto che fra l'alter no 'l s'è mai vazinà - i è deventài tuti mati.
For de testa, come canta (parole sue) quei «Moneskim» (omen nomen…).
E zó co la so storia dei complòti, de quei che - sèmper secondo lù - nei vazìni i n'ha més dénter robe strane.
Noi bevém la nossa candola, e 'l lassém parlar.

Però, cramento, non per darghe resóm, ma en efèti, dopo el covid, i grinpass, i lokdàun, i vari mistéri de l'ombrèla, ne è suzés de tuti i colori.
La guera en Ucraina, po' quèla néla striscia che el Gino el ghe ciama de «Garza», adès i Hùti (ma chi elo sti Huti?) che bloca la navigaziom semper via da quele bande.
E no la finìs chi. Perché ogni dì – a parte ste guère che zà le basterìa... - en televisióm, sui giornai, onlàin, i parla de omeni che copa le done e po' (ma miga sèmper) i s'empica.
È capità pochi dì fa anca nel nòs Trentim, dove paréva fùssem lontani da zerti fenomeni.
Miga perché sem pù bravi e santi neh, sol per el fatto che sém demém de altri posti propri nela zent che abita le zità e le val.
 
Ma se sa, chi no l'è pu questiom de numeri, de statistiche. Par squasi che pù s'en parla de ste tragedie e pù le suzéda.
Eco, su sto punto, el Giani, um lezù e studià, no l'è d'acordi.
«Ma dai che no se trata de emulazióm, anca per el fato che alóra sì bisogneria forse no darghe tute quele righe sui giornai...”».
«Massa cine dove i sbara, i se copa, i strangola le done... Per forza che dopo i vei su che i pensa che sia na roba squasi normal no?»
E bisogna dir che ste robe l'Ilio el le dìs da semper. Anca perché a lù quei cine no i gh'è mai piasui.
 
Ne sém trovai na matina anca a domandarne cossa se podrìa far per darghe en tài a ste violenze.
«Ma se 'l dì dopo tuti i dìs che quel che ha copà la so sposa l'era n'om così tranquilo, a posto. Eco no te poi mai saver quel che a um che gira per el zervèl...»
Sì, va bèm, digo. Pol esser. Ma quando gh'è denunce de méz... Cossa aspeténte a far qualcos? Che la finìssa mal?
«Alora fém le fiacolàe el dì dopo, quando la gaza zamai l'è nada», – el dis a sto punto semper el Giani.
E 'l ghe tàca: «Educazióm nele scòle, psicolozi, discusiom... forsi bisognerìa far qualcos de pù... e chi èlo che lo pol dir e far dalbom?»
 
Sule guere, istessa roba, sol che chì gh'è «zènt alta» che comanda. E quando i te dìs de partir soldà no l'è che te pòdi pontar i péi...
E tutmal i dìs che è aumentà anca le guère picole. Quele tra fitalini del stess palàz.
Magari perché el cagnòt l'ha cagà dove no 'l doveva. O per la machina parchegiàda malament de soto.
Zent che tòl el saluto per monàe. O magari la và da l'aministrator per «farla fòra».
 
No, no l'è propri en bel mondo quel che ghe lassèm ai fioi e ai neoi.
E tanta colpa l'è anca nòssa, se sa, che magari no ne contentém pù de quel che gavém, de quel che sém.
E ne par che i altri i sìa semper drìo a vardarne... per trovar el moment giust per méternela nel cul.
Gh'è sol da speràr che come ne sém acorti (tardi, tutmal) che no podém pù butar ne l'aria veleni, vegna el temp che capìm anca che se seitém a begàr su sto mondo ghe rimeterém tuti quanti nela istessa maniera.