«La me ciàma se ghe fùssa casini...» – Di Cornelio Galas

Ve l'ho zà dit che, quando per el covid bisognéva star serai en casa, me perdévo via a vardar i cine al compiuter. Ensoma, n'ho fàt n'indigestióm.
El lechét però el m'è restà. E cosìta, ogni tant, pù che alter per no farme ciapàr dala poia subit dopo magnà, vago a zercarm qualche cine de quei dove se sbara, i se cópa, i core en machina, e gh'è zent cativa che... no te fa endromenzàr sul divano.

Ale tante però – e no me pàr de esser deventà così vecio bacuco de colp – che ve diga, go l'impressióm de vardar semper el stes cine. O qualcos che tutmàl che somiglia.
Fago qualche esempi.
Suzéde de tut en d'ena casa. Morti, feridi, bombe, fòch. En gazér ensoma.
Quando ariva la polizia gh'è semper qualcheduni sentà su 'n murét o adiritura sul scagnél vizim a l'ambulanza.
Eco, poch dopo, ariva quel che ghe porta na cuerta da meterghe sule spale. Anca se sem magari d'istà, vizim al deserto, e fa en calt dela madona.
Però a dir la verità l'è semper vers sera, o adiritura de not. E se sa che anca da quele bande lì, quando và zó el sol, la cuertèla sule spale la ghe se vòl tuta.

Però – me domando – perché i altri lì vizim i è en maneghe corte? Va bem, lassém star, massa complicà.
Fato stà che en quei momenti lì ariva semper en poliziòt, meio, en detectif, che dopo aver scoltà da quel co la cuèrta come l'è nàda e soratut come la podrìa nar (en pèzo), el tira fòra en biglietim dal so portafòi e 'l dìs: «La me ciàma pura quando la vòl se la gavéssa bisogn...».
Eco, 'n do èla la gàbola? Che se i fùssa tuti come mi, quando se se trovéssa en pericol, sarìa dura ciamàr quel del biglietìm.
Perché me se ghe volerìa demò na mezoréta per capir 'n do l'ho mes via... nele scarsèle dele braghe magari portàe da lavàr o en quele dela giacheta, quele co le zerniere, quele che le sarà na ventina e dove gò denter de tut... anca el cont dela pizeria de l'am passà?
 
Però penso anca a n'altra roba. Gò ’n amico zò per el làch de Garda, compài de naja, adès zamai en pensióm.
Prima el gaveva na tipografia picola. El viveva grazie ai avisi da mort, ai manifesti dele sagre, altra bataria... Eco, se envéze el fussa nà en Merica, sol col detectìf sat quanti biglietini l'avria podù stampar? Perché lì i va via come el pam..

Semper su sto tipo de cine gh'è anca la storia de quando i se sbara adòs. Da na banda quei boni, da l'altra i cativi, se sa. Oscia, dele volte i se sbara anca tra boni, tra cativi, tra quei che par boni e enveze i è cativi e altri che no i sa da che banda star.
Tutmal quando la questióm l'è tra boni e cativi me par che i cativi i dovrìa emparar a sbarar meio. Perché, cramento, anca se i è de pù dei boni, anca se i gà mitra da mili colpi al minut, squasi semper, per no dir propri semper, i gà na mira che a confront me mama quando la me tireva le zavate l'era na pistolera...
 
Ensoma, no i n'embròca una. Al massimo, se propri propri, i ciapa na spàla, na gamba ma gnent che ferma i feridi dal seitàr a sbarar e (lori sì) co na bela mira.
Finisso co la storia dela docia.
El prim, se no me sbàglio, l'è stà el maestro de sti cine da paura: l'Hictok (el so che no se scrive cosi). E la pòra dona nuda, soto l'aqua de la docia, la vèi scortelada fim quando te vedi anca el scarico de soto piem de sangue...barèa.

Eco, me domando perché, i sèita a dropar sto tipo de bruta fim.
Dài, el savém tuti che se una l'è drio a farse na docia prima o dopo la va a finir mal.
No gh'è pù la suspàns de quel prim cine. E ve dirò che dà anca en po' de fastìdi... no so, come veder nei cine dove i aeroplani i casca zò sora el giàz, che qualchedum en qualche modo el riesse a méter su na tenda...de color ros.
E a giustar en qualche maniera el telefonim che s'era spacà en mili tochi.
Enventéve qualcos de nof demò.