Quei scherzi che féven da bòci – Di Cornelio Galas

Quando penso a quel che févo da bocia (mìga sol mì neh) me vèi anca adès i sgrìsoi.
E vist che da grant, som deventà pàre e anca nòno, te te domandi anca quante sberle te te saréssi dàt... oltre a quele che tutmal t'hai ciapà dai tói.
El schèrz che tuti prima o dopo se féva, quel che tra l'alter l'è restà de moda per tanti ani, l'era quel de sonar el campanèl de le case... a caso.
Rispónder qualche monada a quel che domandéva «chi èlo?». E po' scampàr via dal paés... fim a trovarse en méz ale vigne o en qualche boschét sora Bolignàm.
 
De sòlit, per sto scherzét, bisognéva esser almem en tréi. Quel che déva n'ociàda a la stràa (el pàl dela banda ensoma), quel che sonéva (el pù grant... quel che arivéva pù su coi deòti) e po' quel che rispondeva che 'l dovéva esser el pù svelto, vist che dìta la so asenàda el doveva scampar subit drìo ai altri che magari i era zà al cuèrt.
Quante sonàe de campanèi. Quante corse che te paréva de averghe el còr en bóca da l'agitazióm e dala fadìga.
Disénte che la n'è nàda squasi semper bem. Tant dipendéva anca dal cul, dala fortuna ensoma.
Bastéva che en quela casa ghe fussa stà, a quela ora, um che lì, propri no 'l doveva esserghe e... te risciévi de trovarte lì, empapinà, quando el te domandéva: «Ma l'avé finìda de róter le bàle chi en paés?»
 
La vòlta che l'è nada mal, ma mal assà? Quando ero lì, soto, che spetévo la risposta al campanèl e... cramento m'ariva endòs come... come na cascata de aqua giazàda dal secondo piano.
E 'sta veciòta, dal de sora, che la me gòsa: «El rèst spero che t'el ciàpi da to mama, bàsete el cul valà».
E, grazie a dio, no l’aveva butà zó anca el sécio.

L'altro schèrz de quei ani? Quel de lasàr en mèz ala stràa (abitévo a Vignòle, propri en prinzìpi dela Maza) en portafòi o 'n pachét col so bel fiochét. Tut tacà, a na bàva dela cana da pesca, che noi tirévem, da soto el fossà.
E l'era na comédia véder sti chi che paséva. I vedéva sta roba per tera. I vardéva en giro, de chi e de là.
E po' zàch, i se curvéva per tor su co le mam... quela roba che envéze la scampéva via come en sórz che gà drìo el gàt.
 
El pù dele volte la n'è nada bèm. Anca per el fato che èrem svelti e l'alter el restéva lì a bóca daverta, come en pampalugo.
Na volta, quando gavévem méss denter la scatola la merda del cagn da caza dei mei, i è partidi en prèssa... con quela machina. Pò na frenàda. Marcia endrìo. E se no ne butém da na banda la merda la n'ariva en testa. Quel che no tornéva endrìo enveze l'era semper el portafòi.
Na volta ciapà en mam... ah te podévi tirar quant che te volévi... l'era nàda zamài la gaza. E po' spieghéla ai toi che magari l'è stà el gat a portarlo en giro a casa.
 
Tute ste robe prima che néle case scominziés a 'rivàr i primi telefoni. Quei fìssi, se sa, anca perché i era propri tacài ai muri.
Ero zà pù grant. Nèvo en prima media. E gh'era en profesór propri catìf. Um de quei che sol a vardarlo el te metéva paura.
L'idea la n'è vegnùa, quando ne sém trovài, mi e altri dó boci, a casa de um de Riva, per far enséma i compiti.
No gh'era i sòi de sto compagn de scòla. E alora ciapém sto libróm del telefono. Zerchém el nome del professór... e dove l'abita.
Pò na bela telefonàda al Sait che alora el portéva la spesa ai veci co le Api, coi treròde ensoma.
E zò n'elenco de robe da magnar, da bever... en cont gròss. Fata la telefonàda sem nài co le bici vizim ala casa del professór. E... no ve digo le brute parole che 'l s'è sentì quel pòr putèl del Sait... Gnanca fussa stà l'ultim dela classe...
 
Ah, da grant, ho dovù contentarme dei scherzi del prim de april sul giornal.
La roba pù dura de questi? Convìnzer i vari diretóri de l'Adige che quei che lezéva i avrìa capì che l'era en schèrz. Anca se no l'è mai suzés.
Anzi, sté tenti, perché el prosimo prim de aprile l fago col Guido…