Quel che conta l'è che i se pèrda via... – Di Cornelio Galas

No sóm ancora ensemenìto (anca se magari som vizìm a deventarlo, ah savérlo), me ricordo che ho zà parlà dei regài de Nadàl, dei mercadini, de come è cambià le feste de dizèmber en 'sti ani.
E no volerìa tutmal passar per el solito vecio trombóm che gà nostalgia de quando l'era zóvem.
Ma ho vist la festa de Santa Luzia en Busa. Co le so strózeghe (coi candolòti ligài co la sogàta… le févem longhe anca noi neh), le feste nei asili, e tuti che bàte le mam.
Bèl. Tut bèl come na volta. Pecà però che no 'l dura.
 
E cosìta zà qualche dì dopo te vedi 'sti bociéti en pizeria. Col so bel telefonim dove i gà més su el videozógh.
Da na banda i bòci. Da l'altra i grandi. Che, entant che ariva la pìza, i gà anca lóri en mam i telefonini.
Che i varda senza parlar... né a quel da l'altra banda del telefonim né a quei che é sentài vìzìm.
Ensoma, par na zéna tra muti. E forsi anca sordi, perché de sòlit el cameriér el deve domandarghe pù de na volta a chi èlo che'l deve servirghe la capriciosa... e de chi èla quela col persùt e fónghi e de chi èla la margherita...
 
Ma no l'è finìa. Perché anca quando ariva le pìze no l'è che i sméta de trapolàr coi telefonini.
Na forchetàda e n'ociada al telefonim. N'altra sforchetàda e subit lì coi oci...
La spósa la sa che quando m'encanto a vardar qualchedum l'è perché – così la dis éla – me fa pensar zerti modi de far.
E alora la me dà na peàda nei stinchi, soto el tàol:
«Ma Cornelio, dai, che anca noi a so temp coi fioi picoi ghe dévem lì qualcos da far, da brigàr... così i se perdéva via. E i stéva almem sul tàol envéze che nar en giro a corer per la pizeria... no t'el ricòrdit?»
 
Sì, l'è vera. Come semper la gà resóm. Anzi, come se dis, na volta la gà resóm èla, na volta gò tort mì.
Però, oscia, almem noi se féva do ciacére.
E anca i boci, col so bel album da disegno, tra en sgórbi e en spegàz, qualcos i diséva («Te piàs el me disegno papà?»).
E anca a casa, se la spósa la doveva netàr la casa, i fioi i era sul divam, davanti ai cartoni animài en televisióm, coi pei alzài, quando passéva la 'spirapólver.
 
Oh, capìntene, No la gò su coi telefonini neh. E gnanca con zerti zugàtoi moderni.
Sò bem che i è altri i perìcoi grossi quando i boci i scominzia a deventar grandi.
E so anca quante ansie gò fat patir ai méi quando nevo en giro de nòt col motorìm.
Sì, gh'era anca nei me ani el riscio de... pèrderse via fim massa con robe che féva pù mal de n'ociada al telefonim.
Ma quel che me làssa tanti dubi l'è quel che podrà cambiar (en pézo o en mèio?) co sta storia de l'enteligenza artificiale.
 
È bastà pochi ani per far na rivoluzióm dopo che è arivà i smàrtfom e batarìa varia.
Ogni tant ghe penso: ah se avés podù mandarghe n'sms a quela putela che me piaséva e che gavévo rispét a parlarghe...
Ah, se i primi ani che lavorévo al giornàl avès podest far foto e anca cine e mandarli subit a Trent dal pòr Giorgio Rossi...
E drio mam tante robe che ha cambià en meio la nossa vita. Ma anca creà novi problemi.
Per esempi: se te fài qualcos de stort, come se vede, basta la memoria del to telefonim per meterte nele grane.
 
Ma l'è anca vera che no te serve pù na carta geografica per nar en giro e trovar qualchedùm se te gài l'indirizo.
E se no tel gài prova su gugol, feisbuch, tik tok... prima o dopo t'el gàti.
Eco, vardé el problema de quei che vive ala giaponese, semper serài en casa, davanti al compiuter, quei che co 'n panét e na coca cola i tira la giornada e anca la not en quele condiziom: «Hikikomori» la se ciama sta malatia. Vol dir: stàre in disparte».
E tut el rest che 'l se ciàva.
 
No volerìa che coi nòvi mistéri de la tecnologia se finìssa per far farghe i compiti... a l'inteligenza artificiale.
Come zà adès ghe disém a quela...Alexa de meterne su la canzóm che ne pias, de empizàr la luce, col temp magari anca de farne en cafè... senza zucher.
Per farla corta, sarìa propri el massimo se tra pochi ani dovéssem darghe qualcos da far a sti robot. Così... i se perde via anca lori e no i rote le bale.