Stropéve anche el nàs ma... né a votàr – Di Cornelio Galas

’Na volta i preti i diseva «No ve disém per chi votar. L’impotant l’è che voté per un partito che sia democratico. E soprattutto cristiano». Adès no i sa cossa dir...

La và semper pèzo quando se trata de ciapàr la carta eletorale, quela de identità e nar a votar.
L'è de pù quei che stà a casa de quei che ciapa l'anda giusta vers la gabina.
E miga sol per le europee: anca a Roveredo (dove bisogna farla fòra tra Lui (el Gianpiero) e Lei (la Giulia Robol) no l'è che ala prima tornada ghe sia stà la cóa neh. Anzi, disénte che zamài, la metà, forsi anca qualcos de pù, fra quei che gà el dirito (e anca el dover) de votar, i sta ala larga da quei scatoloni dove se buta i tochi de carta con su le cròs fate en gabina.
E, se no i resta a casa, i va a farse en giro pitost che tòrse quela briga.
 
Zà, par squasi temp butà via: «Tanto va su i soliti, quei che vòl i partiti, l'è del pit zercar de cambiar le robe.»
Pò gh'è quei pù lezùi e studiài: «Ma dime ti perché dovrìa votar quei che se anca i vinze no i narà mai nel parlament europeo perché i è zà sistemai da altre bande...».
Per no parlar de zerti discorsi al bar: «Cossa crédei che sol lori i gà dei soranòmi? E alora el Berto de Vilazàm, deto el Biciéra?»
Diàolpòrco, ala fim, parerìa, a qualchedum, de far propri bem a no nar a votar.
 
«Perché quei lì (quei chi?) l'è da ani che i ne tòl per le bale. E na volta eleti no tei vedi pù fim ale nove eleziom da chi a qualche am».
«Perché dai e dai s'è capì che no i bate gnanca en ciodo, che tut resta come l'era, che quel che conta l'è, per lori, ciapàr tuti quei soldi ai primi del més.»
Va bém tut, ma ala fim de tuti sti discorsi no sem né fodrài né embastidi come prima.
Se trata de decider se nar, tutmal, a votar o no.
 
E chi vèi bòna na vecia batùa del por Giulio Andreotti.
Che 'l diséva: «Stroéve el nàs e né a votar».
Lù, per la verità, el diseva – nel dùbi – de votar per i democristiani. Che però l'è da 'n pèz che no i ghè pù.
E magari i s'è misciai, scondui en altri partiti.
Tutmal meio stupàrse el nàs e votar quei che fa mém spùza che no nar a votar.
Perché? No l'è per far le solite ciaceràe sula partecipazióm.
 
Sula democrazia, su quei che è mort per darne na Costituziom al posto dela ditatura fascista. Sì anca per questo, soratut per questo.
Ma se ve par normal, massa normal nar a votar tanto che... s'è squasi stufi de farlo, prové per n'atim, a pensar de podér far na telefonada. Eco, ciapé el telefonim e féghe en colp a um che vive dove da temp i s'é desmentegai cossa vol dir eleziom.
O dove adiritura no se vota da semper, perché comanda um sol e quei de la so famea quando el more.
Eco, secondo mi, basterìa do parole con sta zent per convinzerve che la gavé grassa... forsi massa.