Quando paséva i coridori... – Di Cornelio Galas

Quando paséva la carovana, l'era bel per noi putelòti. Perché dale machine i butéva i capèi dele dite. E zugatolini de plastica. E anca scatolete piene de caramele

È apena pasà anca soto me casa el Giro d'Italia. Coi coridori, le moto davanti e de drìo, i elicoteri su alt, tanti (prima) en bici per nar su vers Santa Barbara e trovarse en posto còmot.
E po' furgoni co la musica a manéta, reclàm, machine de quei che a 'sti coridori i deve darghe na mam.
Tut finì nel giro de n'oréta, dai. Senza tanti casini per le stràe seràe.
A parte i soliti che sèita a dir che i coridori l'è meio che i faga le so gare nei velodromi e i làssa 'n pàze quei che gà da nar a laorar o a far le so robe.
 
Se sa, se néssem tuti d'acordi su tut no ghe sarìa pù guere. E i avocati i dovrìa cambiar mistér.
Ma no l'è de ste robe che volerìa parlàrve ancòi. Pitòst de come, nei ani Sesanta, se spetéva – ero putelòt alòra – i coridori del Giro.
Se tachéva via zamài na stimàna prima. “
«Alora, se i pàssa da Riva, po' i vèi su sul stradóm (cosi ciamévem le stràe statali, quele pù larghe e longhe, quele de l'Anas per capirne) vers Arco.
«E alora convegnerìa meterse lì vizim al Casinò, dove no i pòl nar tant en pressa... ché gh'è tante curve».
 
E 'sa févente noi boci na volta zernì el posto giust per spetar i coridori?
Gh'era quel che el ghe tegniva al Motta, quel che ghe piaséva Dancelli. En teróm che no 'l vedeva altri che el Vito Taccone.
E po' quei che envéze i gavéva oci sol per el Mercs (el so che no se scrive cosita ma mi l'ho sempre ciamà en sto modo).
Alora, prima dei coridori anca alora paséva la carovana. E l'era quel el bel per noi puteloti. Perché dale machine i butéva fòra i capèi dele varie dite.
E po' zugatolini de plastica. E anca, pensa ti, scatolete piene de caramele.
 
L'era na festa. Con quei pu grandi che el dì prima i scriveva co la calzina i nomi dei campioni sui mureti o su l'asfalto (anca adès i fa l'istéss... ma me sa che no l'è i boci a farli).
L'era bèl po' ala sera, quando i feva el process ala tapa (col Zavoli, dopo le cronache del De Zan) veder quei cine dela giornada....
«Mama, mama... varda lì el Celestino che tòl su el capelòt... l’hat vist? L'era propri el Celestino quando i è pasài da Vignole».
Ensoma, el Giro, quando el paséva dai nòssi paesi, l'era na gran festa, Perché se podéva restàr a casa da scòla, perché tut se ferméva, meio che en dì de sagra oscia.
 
Me ricordo quando - vegnendo zó dala Maza (èrela na cronometro sul Giro dela Busa?) - el Mercs propri davanti a me casa, disénte denòr a l'Hotel Everest (alora hotel Belavista), l'ha dovù fermarse perché, cramento, l'aveva sbusà.
Nel giro de gnanca vinti secondi, a ocio, è ariva la machina che la gà dat na bici nova. E i l'ha butà per na ventina de metri.
No so, come l'è finìa quéla volta, però quando vegnéndo da Arco, da na gita coi scàut, ho sbusà la ròda dela me bici... me som vardà entorno, come se qualchedum dovés darme na bici nova per nar su a casa.
En sogno che m'è restà... fim quando som riussì a cromparme el motorim.
 
Oh, no som drio a dir che la néva meio quando la néva pezo neh.
Perché anca ale elementari de Bolignam, quando è passà i coridori che i ciapéva la stràa per Vel ho vist tanti boci co le bandierine rosa en mam.
Ma me pareva, come dir, na roba squasi preparada prima dale maestre... no ensóma qualcòs che vegniva dai boci.
Me sbaierò de sicur. Domando scusa subit.
Ma el Giro de na volta el me paréva pù... pù vizim. No so per cossa.
Ma de zert alora no gh'era quei che ostiéva perché, per colpa dei coridori, no 'l podéva nar a tor da magnar al Poli... o a cromparse i zigareti en machina.