Robe che suzéde al cine – Di Cornelio Galas

Mi ghe dàgo la colpa al covid. Ensoma al loch-dàun (el cul en tèra), ai cuèrta fòghi de quando se doveva star serài en casa.
A vardar la televisióm.
E soratùt i cìne, disénte la verità. Perché se t'empizévi sui telegiornài te vegnìva qualcòs de pù del magóm o del pipacùl.
Tute ste parole da lezùi per dir che anca mi, nel mi pìcol, me som fàt en quei mesi lì, n'idea 'n po' diversa dei cine.

Oh, capìntenem 'l so anca mi che l'è tut per finta. Che um che el casca da l'ultim piam del grataziél no l'è che el mòra per dal bòm.
Ma no l'è de 'sti truchi che volerìa parlarve, pitòst de na serie de regole che par che le sia tute gualìve soratùt nei cine che finis mal o che te fa tegnir strucà el cul fin ala fim.
 
Tachém via propri dala fim de 'ste tragedie. I s'è sparài adòs.
Gh'è stà tanti morti. Che i porta via co la barèla. Luci dela polizia dapertùt. Subit i cordoni de plastica entorno a la casa del masacro.
E 'n banda, quei che en qualche maniera i è riussìdi a salvar la pèl? I è semper sentài su na banchéta o sul portabagai de l'ambulanza.
E tuti co la so bela cuertèla endós. Che i ghe la dà semper. Che sia istà o inverno. La so bela cuertèla per far le ultime ciaceràde prima che finis el cine:
«Eh dai, la podéva anca finir pezo...».
Pò el so bel piantìm, el fazolét per sugarse le lagrime. E qualchedum che per fortuna el ghe dis:
«Dai, che forsi l'è mèio tornar a cà, che 'n disé?».
 
N'altra roba che me sóm notà de sti cine l'è quando qualchedùm, nela so cà, el sente sei rumori strani.
Ensoma, en ciàs che no l'è normal. No l'è el cagn che sbaia. No l'è la televisióm lasàda empizada. No l'è el marì che è apena arivà dala riuniom dela sera.
E alora, coss'elo? Se sa, l'è queste le situazióm che fa vegnir la sàspens, la tremaròla.
No capisso alora perché quei che è en casa e che sente sti rumori strani i domanda «C'è qualcuno?»
Ma come? Vòt che se mi som um vegnù dénter to càa de strafuch, magari per coparte, te risponda «Sì, som el Babao, gò en cortelaz e som pena vegnù a to ca per scrautàrte su come en salam...».
 
Parlém de bombe. Ale tante i ariva a capir dove quei altri (i cativi, de solit) i ha mes la bomba.
Che la gà semper el taimer. Ensoma, na specie de orolòi che te dis tra quant salta tut per aria.
'Sa fai sti fenomeni, sti eroi? I stà lì a pensar a qual dei tanti fili taiar. E l'orolòi el va envanti...
Mem en minut, mem trenta secondi... E lori semper lì co sto cortel...
Tàia quel blu o quel vert? Se sa che ala fim i taia semper el fil giust ma no èrelo meio taiar enveze la corda e nar de volta coi péi che toca el cul?
 
Bei anca quei momenti dove um el tira fòr la pistola e 'l ghe la pònta contro um che el gà envéze en manaròt lonch.
Dovrìa vinzer quel co la pistola no? Envèze la pistola la fa clic. La s'encanta.
Ma no l'è che quel col manaròt el ne profita. No, cramento. Anca lù (massa sicur?) el sbaglia a zercar de copàr que l'alter.
E alora la va a finir a pugni e peadóni. Fim quando, magari, el prim (quel de la pistola) el riésse a trovar per tera que l'arma che l'ha ciavà.
E stavolta, miracol, el cólp el parte. Varda ti dele volte ah?
 
Oh dio, no l'è che na volta la néssa meio neh. Me ricordo na reclam del salam Negroni, sule Maroche de Drena, col pòr Salvadori da Caneve, el vive serifo.
Sbàri de chi, sbàri de là. E an zerto punto, em mèz al deserto mericam... Na bela stràa asfaltada, col furgon de na dita de Vezàm con su scrit «Termoidraulica tal dei tali...» che passa con um dal finestrim che saluda tuti i atóri.
L'è nada en televisiom sol na volta, Pò i l'ha taiada... Ma entant pù che del salam gà avù reclam quei de le caldaie.
 
Na volta ero nà enveze a Torbole dove i registreva la reclam del Stock 84.
Tut bém. Perfeto. Fago le me foto per el giornal. E quei dela trùpe i m'envida a zena la sera, el temp de portarghe qualche foto stampada en pressa drio le quinte.
Oh, finì la zena che fussa stà um che l'ha domanda come màzzacafè en Stock 84...
 
Pèzo l'era nada quando a Arco gh'era en grop de amizi che voleva far... i cine per so cont.
I m'aveva fat nar su sora a Passo San Zoan. Na machina trovada dal Bigolom (quel che gaveva el posto per le auto vecie en via Mantova a Arco, prima del zimiteri).
I 'sassini i monta su sta machina, pò stop. Tuti fermi. I smonta.
E la cinepresa la ritaca via... Sol che quei che doveva butar sto zamai rotam de machina da na scarpada... i buta massa piam.
La machina, per quel, la và zò. Piam, ma la va zo.
Sol che, oscia en mez gh'è na pianta de sambuch. Che la ferma la machina propri quando la dovrìa ribaltarse.
En fase de montagio è stà mess tut a posto en qualche maniera: te vedi la machina che va zò. E subit dopo, da n'altra banda, che la ciàpa foch.
Credo bém... avem spendù pù de benzina dei soldi dati al Bigolóm...