Come méter 'l cul nele peàe – Cornelio Galas

Né envanti così, valà, co la «Cilovia del Garda». Ma no le vedé le frane che vèm zó?

Fórsi co l'ultima fràna vegnùa zó la stimàna pasàda tra Riva e Limóm, i l'ha capìa (tant per restar 'n tema) anca... i sassi.
O mèio, quei che da temp i volerìa far na pista per le bici (soratut a sbàlz) denór al lach de Garda 'n quel tòch de stràa.
Zà, perché da Limóm fim al confìm col Trentìm, demò, sta stradòta per le bici (e anca per quei che và a pé neh) demò i l'ha zà fàta da qualche am.

A enaugurarla era vegnù anca el ministro dei zinque stelle Toninelli. Quel per capirne che l'è (o meio, l'era) convinto che la galeria del Brenero, quela longa che i gh'è drìo da ani, i l'abia zà finìa da 'n péz.
Bèm, tutmal, l'è da 'n péz che se parla anca de na ciclabile entréga per el lach de Garda.
Che ensoma da Limom la passa per Riva Malzèsem... e che la te fàga nar en bici tut entorno al lach.
Gustandote el panorama, respirando aria bona e soratut lontam dai fumi e dai perìcoi dele machine sule Gardesane.

Bela idea no? Ah, a so temp i era squasi tuti d'acordi. Pò è scominzià piam piam i casini.
El prim problema: i costi nài en su anca del zento per zento.
Quel pù gros? Le frane che, una drìo l'altra, le ha tacà via a vegnìr zó propri en quei posti dove i doveva far ste ciclabili.
Fato sta che adès i è pochi quei che alzerìa la mam per darghe el via libera a sti progèti.
Gnanca i ambientalisti, quei che ghe vol pu bem ale bici che ale machine, i parerìa contenti, come na volta, de ste piste... a sbalz, soto na montagna che vèi zó a tòchi e tochetìni.
 
Anca senza savér né lèzer né scriver, però, tanti, anca pù zoveni de mi, ensoma zènt che no è vegnù zó co l'ultima néf, i pol contàrve che tra Riva e Limom, tra Torbole e Malzésem, de frane n'è semper vegnù zó. Tante.
E le ha fat tanti e grossi dani. Oltre a copàr tanta zent.
L'è stà anca per sti casini che a so temp i ha fat tante galerie nòve. Artifizàli, cioé en cemento armà.
O sbusando per far galerie dove – anca pochi ani fa, per dir – um de Bolignàm l'era restà soto i sassi cola so Ape.
 
E se parlém de ani ancora pù endrìo, no gh'è bisogn de domandarse perché zerti tòchi dele Gardesane i è stài lassàdi perder perché massa soto pareàne de balòti che podeva (e i ha podù) vegnir zó da 'n moment a l'alter.
No parlénte po' de fòghi che ha brusà tante de quele coste sora el lach.
O del teremòt del dizémber '76 che l'ha portà via per semper en basament de cemento sula spiagia vers Limom.
Ma soratut – grazie ala sindaca de Molina de Leder, Agnese Rosa – l'ha portà en Trentim i soldi per la nova galeria al posto dela vecia stràa dela Ponale.
 
Eco, chì volevo 'rivar. Sula vecia Ponale adès i ghe làssa nar a quei coi rampichini o che vòl far do passi vers la Val de Leder (o anca vegnir zó neh).
E tut questo anca se de frane su quela vecia stràa ghe n'è stà ancora. Anca se qualchedùm l'è finì de soto...
D'acordi, anca nela nova galeria s'è rot qualcos poch temp fa. Ma, diaolporco, sula Ponale se te bèchi en balòt en testa no gh'è caschi da ciclista che tegna...
E per tornar a quela che i ghe ciama «ciclovia del Garda», me sa, che basterìa la metà de quel sasóm vegnù zó pochi dì fa, poch dopo la centrale, per méter nei casini quei che firmés l'autorizaziom per far sto progeto.
Meio pensarghe prima che dopo, ensoma.
Anca perché, encrosando i déi, le frane no le telefona mai ai pompieri o a quei che stà drìo ale stràe prima de vegnir zó...