L'è dura mocàr lì de ghebàr – Di Cornelio Galas

No funo pù. E no me ne ciàva se la nicotima la me ciapa a peàde en del cul perché riscominzia a ghebar. La nicotina la pòl nar a farse ciavàr

L'è zamài 'na stimàna che no ghèbo, sì ensoma, che no fumo pù.
De colp, propri dala matina ala sera, me sóm dìt: «Oscia, sto scainando... sta tós la me dà massa fastidi.
«E per de pù tiro fòra anca dei soldi ogni dì per fàrme star 'sì mal.»
E alora ho ciapà l'ultim pachét de zigaréti che gavévo nela scarsèla dela giaca e l'ho butà nel bidóm dela indiferenziàda (èlo giust butar i zigaréti lì?) e zà che gh'ero ho trat via (nel bidom dela plastica) anca l'acendìm.
Tanto per empizar i fornèi del gas basta schizàr i so botoni.
 
Eco – fasèndo i me conti – fim adés dovrìa aver sparmià sui sesanta euri per i zigaréti e ho 'péna scominzià neh.
E po', fat sesanta (el doppi de trenta) ho pensà anca de far sesantùm.
Basta bianchi e rossi al bar, basta biréte a casa, basta anca co le sgnapéte dopo el cafè.
Come stàgo? Mal, cramento. Propri mal. Ogni tant (de spéss) el zervèl el me dìs:
«Ma sét deventà mona de colp? Varda che a torte via tuti i vizi te risci de nar for de testa... che zà tant giust no te eri gnanca prima per quel».
 
Ensoma, sto Lucìgnol el zerca en tuti i modi de portarme de nof sula cativa stràa.
El sèita a darme peàe nel cul, sgombetàe sula panza:
«Ma fàte 'sta gheba che no te mori dai... No me piàs la zéra da caign bastonà che te gai adès.
«E po', 'sa fat, te dàt a l'aqua? Varda che quela la smarzìs i canài neh».
 
Cossa dirve... l'è dura diaolporco. Soratut dopo magnà.
Quando de solit névo sul terazìm e m'empizévo quel zigarét che l'era come n'àmem ala fim de na Messa cantada.
E cossa dirve po', ancora, de quele volte che t'eri magari agità de tuo e col zigarét te paréva de darte en pél de calma... O dele ghebe fate entant che se spetéva qualchedum... magari al fret, che no te capivi se quel che te butevi for de boca l'era fum de zigaréti o vapor.
 
Ho tacà via prest a ghebar. Me digo vers la fim dele medie. Prima però avevo provà co le «fizze». Che sarìa dei bachéti pìcoi, sechi (de sambuch) col busét vòt. Te empizévi da na banda e te tirévi da l'altra. Senza filtri. L'era stà i bòci pu grandi a ensegnarne sta roba.
Va bém, dopo pù grandi, bisognéva però star atenti a sconder i zigareti crompài co le monéde messe ensema a far i ceregòti. E co le mance che te laséva en mam la nona, le zie, quando se néva a trovarle.
Na volta, col motorìm, ero stà ciapà soto da na machina dale bande del Santuari dele Grazie, a Zeole, Apena ho avert i oci, sul let de l'ospedal, la prima parola che gò dit a l'enfermiera?
«La buta via el pachet de zigaréti che gò nela scarsèla...».
 
El rest? Ho provà anca le nazionài senza filter, le goluàs, zigaréti fati su a mam, co le cartine e 'l tabàch, la pipa (ma l'era massa brigosa... e po' la se smorzéva subit).
En par de volte anca la mariuana... ma no la m'ha mai ciapà. Vegniva la ridarola en quel moment. E po' m'endromenzévo.
 
Ma adès ho propri deciso: basta. Marti che vei vago dal me dotór.
El m'ha dit che gh'è qualcòs che podrìa aiutarme a no averghe pù 'sta voia de ghebar. Na roba galenica (ma no l'è galatìne) che i fa en farmazìa.
E che dovrìa farte spazzàr la spìzza de meter en boca zigaréti.
Sperente che la vaga bem. Entant me scuso con tuti. Perché? Perché al Monopoli de Stato de sicur vegnirà a mancar tuti quei soldi che ghe devo prima.
Per dir... se no i ve sfalta la stràa davanti a vossa casa la colpa podrìa esser mia. Va bem, ma en tuti sti ani no m'avé però mai dit gnanca grazie, oscia.
 
La zònta del Guido.
Brào Cornel!
Ho finì de fumar 37 ani fa. Non l’è sta difìzil: dopo na stimana ho capì che ghe l’averia fata.
Anca mi, come el Cornel, la nicotina la me empiegniva el cul de peàde, ma dopo tre mesi la s’ha stufada.
Però devo dir na roba: la cosa pù difizile nela vita l’è sméter de fumar.
Quindi, scolténe boci, no dové scominziar a fumar. Mai. Punto.