Chi va piam... el s'encàzza e l'ariva tardi – Di Cornelio Galas

Quéla volta che ho scrit su L’Àdes dei vigili urbani che el dì del Patrono i aveva postegià a balom «A S.Sebastiano il vigile è poco urbano»…

Se fa 'n gran parlar, da mesi, de 'sta storia dei trenta a l'ora che dovrìa deventàr el massimo dela velozità sule stràe en zerti punti dei vari comuni.
No l'è na questióm fàzile. L'è come desgartiàr en gróp fàt su ala vàteciàva.
Perché gh'è da ’na banda l'intenzióm – pù che giusta – de far en modo che sule stràe ghe sia men pàche da òto, con zènt che se fa mal o adritura ghe mòre.
Da l'altra bisogna, se sa, cambiar anca zerte abitudini. Perché, dala matina ala sera, te devi star atento a schizar su l'aceleradór,
 
M'ha fat pensar, ve dirò, n'articol (de na pagina entréga) che l'ha fat qualche dì endrìo, el vicediretor de l'Adige, al Paolo Micheletto.
Cossa àlo fat el Paolo? L'ha provà a nar en giro per Trent dove se ne podrìa nar de pù dei trenta l'ora.
E cossa è vegnù fòra? Che en zerte ore, anca se te voléssi, pù dei trenta no te pòdi tutmal fàr. Anzi, zà nar ai vinti a l'ora sarìa... tanta roba.
 
El so, questo no vol dìr che da domam bisogna cambiàr tut e méter magari cartèi con su scrit... che en quele ore bisogna darse na mossa.
Ensoma nar pù dei trenta... per no fàr le coe.
Però, 'sto fatto, més ensema a altri che me ricordo, me fa vegnìr dei dubi.
Per esempi: no l'è che stém pasando dal massa al miga?
No l'è che de colp volém taiar el cavél en mìli tochi?
 
Me ricordo, 'sti ani zamài (ma anca adès no l'è che la sia cambiàda tant la solfa) quando se se trovéva en dì sì e quel'alter anca, sule Gardesane. Tra Torbole e Malzésem, tra Riva e Limóm.
Bèm. Se te capitéva el camper, ma anca ’na machina grossa e longa, de todeschi o olandesi, te podévi méterte l'anima en paze.
Perché sti chì, pù dei trenta no i féva. E no i néva sol lenti. Ma ogni tant i néva anca pù piàm.
Per vardàr el lach, per vardar la cartina (quando no gh'era ancora i navigadori), per far quel che no s'è mai capì.
Ma, òcio. Che ogni tant i frenéva anca. Per po' nar pù svelti propri quando gh'era la retta dove t'avressi podù superarli.
 
Va bém. Dopo quei ani de rotiménto de bàle, ha scominzià a 'rivar quei dele bici.
Magari col carelìm drìo con denter el bocia. Che me domando: ma no gavé paura a nar en quéle condiziom...? Che basta che qualcos vaga mal e... va bem. Cioé la va mal.
Come per dir a Arco dove scominzia a esserghe zà sula stràa i segnai per... star ala larga da quei che va en bici.
Cioé te devi butàrte de là... sperando che no ariva da l'altro vers l'ambulanza.
 
Oh, per carità. Meio nar piàm che massa en pressa. Miga tant temp fa i m'ha dat na multa (miga pochi euri neh) en via Mantova, vizim al zimitèri de Arco, dove per dir gh'è il limite dei trenta a l'ora da 'n pèz.
Névo ai quarantadó.
Ero apena vegnù fòra dal tabachìm. E um, che vegnìva da l'altra banda, el m'ha fat segn de vegnir fòra...
Zento metri dopo, gnanca el temp de méter la quarta, la paléta dela polizia. E ciao fighi.
 
Che dopo te pòdi star lì a spiegar le to resóm fim che te vòi.
Ma quela l'è la velozità che ha segnà l'autovelox. No gh’è mal de bàle.
Eco, no som d'acordi con quei che tàia sti argàgni e i semafori. No se fa così. Se no vèi fòra che ognum pòl desfar quel che no ghe và, quel che ghe rompe le bale.
 
E parla um che, a so temp, gà avù spes e volentéra a che far coi vigili.
Me ricordo na volta che, arivà en piazza dela ciésa, a Arco, per la festa de San Sebastiàm, patrom propri dele guardie del comum, avevo vist che i avéva parchegià tute le so machine soto i pòrteghi de palaz Giuliani.
Alora chisà come (ero zóvem...) m'è vegnù l'idea de farghe na foto.
El dì dopo, el titol l'era questo: «A S. Sebastiano il vigile è poco urbano».
Podè enmaginarve la reazióm. No, no gavé idea de quel che m'è suzès...
Pochi dì dopo, arivo en piazza. Parchegio la me Renó 4, méto el disch orari. Vago a farme en café al Trentino.
Torno e... trovo na multa. Oscia, perché, domando ai vigili che gavéva la sede al piano tera del Munizipi? «Perché te gài le luci dei freni che no funziona...»
Eco, da alora ho zercà de far semper el bravo sula stràa. E no ho mai scrit pù gnent sui vigili, se sa. Oh, l'Adige le multe miga me le paghéva...