Ciao, oscia no te vedo da l'am passà – Di Cornelio Galas

Quel che resta dopo che la tredicesima zamài l'èi nada a farse ciavàr, tra zéne, regài, viàzi e altre spese

Da «tanti auguri a ti e ala to faméa» l'è n'atimo arivar, en sti dì chì, a «Madònega, l'è da l'am passà che no ne vedém: tuti bèm, tuti fòr dal lèt?»
Pò finalmente è arivà l'Epifania, che tute le feste la se pòrta via.
E anca questa l'èi nàda. Per Pasqua gh'è ancora temp...
Ma – féghe caso – no l'è questa so màre.
Disénte che, come semper, ai primi de zenèr, finì le feste, se se trova entant davanti en més dove no gh'è pù i famosi «pónti», ensoma quei dì de festa che se te ghe tàchi sabo e domenega te vèi fòra almém tre-quatro dì de ferie.
E anca st'am - vàrda tì che sfìga... che dura da semper – Pasqua la vèi de doménega. Gnent da far.
 
Fùssa sol questi i gazèri. L'è che ghe se méte anca la questióm dele boléte, dei soldi da tirar fòra per quest e quel.
Da tuti quei conti che te ariva drìti sui denti propri dopo che t'ha apéna més via i capelini da mat e le trombéte de l'ultim de l'am.
E soratùt dopo che la tredicesima zamài l'èi nada a farse ciavàr, tra zéne, regài, viàzi e altre spese che, lì per lì, te disévi: «Ma dai che tanto la bara no la gà scarsèle, se vive na volta sol, cramento».

Eco alora che te te trovi en màm 'sta boléta del gas da passa dozènto euri.
E quel tabachìm dove te vai a pagàrla 'l te tòl anca per el cul: «Ma la Befana no t'àla portà el carbóm? Dròpa quel per la caldaia no...».
Eh, l'è lonch zenèr. E meno mal che po' febrèr l'è pu cort. Ma prima bisogna arivarghe.
Lèzo sui giornài che sta inflazióm piam pianèl la stà nando endrìo. Sarà. Ma me par che la sia dura anca rangiarse con pàm e formài.
En tochét – digo en tochét neh, che con tre zacàe l'è finì – de formai semplize, no de quei de marca, no de quei pu boni e costosi, se no te paghi quatro euri vèi forma tre euri e novantanove.
 
E lassém perder tut el rest che te méti denter el zestél al supermercà.
Nar a magnàr fòra? Va bèm, l'ultim de l'am ne sém fati ciapàr magari. Otantazinque euri a testa, che te dìsi... som stà propri mona anca stavolta.
Ma anca adés, nar fora a magnar na piza no l'è che… i te la tira drìo neh.
E po' la storia dei saldi. Che – me sbaglierò – me sa squasi tòr per el cul quei che, prima, i ha pagà el prezzo pieno.
 
D'acordi, vòt la roba bela senza sgarbiàr tra quele restàde en botega? Alora te te devi nar mossa prima.
Ma, diàolpòrco, en sconto del setanta per zento, de l'otanta adiritura... gàt propri paura che te resta el magazìm piem de robe che, passà la stagiom, no le vòl nessum?
Ma ste chì le magari pàre che me fago mi. Che no so bem come la va la storia del vender e del crompar.

N'altra roba de l'am nòf, o mèio, de quel vecio apena passà, l'è le bele idee che gavévem en testa la not de San Silvester.
La prima: «Ah, col domilievintiquatro magno e bevo de mem. Me méto la tuta e la matina fàgo do bele corséte en campagna. Devo calàr almém quìndese chili.
«Sì, sì, stavolta me méto de impegno, giuro. Eco, zà el prim de l'am, quando de solit se deve far fòra i vanzaròti, apena se se riméte dai stormenimenti del trentun dizémber, tante de ste promésse l'è nàe a farse benedir.
«Perché vòt lassàr avèrt a metà quel panetóm? E quele botiglie de spumante vanzàe... le lassénte lì fim a Pasqua?
Ghe sarìa chì ancora almém tre piati de lentichie... E po' el speck portà dal zio de Laives... E anca mèza Sacher.
Ensoma, avé capì no come la va a finir. Miga sol el prim de l'am, perché, ciapà l'anda... per tirarte su dale bolete pagae, se pol anca nar a tor na piza da portar via no, così sparmiém sul coperto.
 
Anca mi per st'am avevo promés de smeter de fumar. Perché, fat i conti, al monopoli de Stato ogni dì mi ghe dago na bela cifra neh.
Se po' i sèita a aumentar el prezzo... Per farla corta coi soldi che mi ghe dago i podrìa 'sfaltar chilometri de stràe.
E alora me som dìt: mi la mòco lì coi zigaréti.
Però me dé na bonuscita se no fìtto na ruspa e ràito su tut quel che avé sfaltà coi me soldi, cramento.
Pò gò ripensà. Massì, l'è na monada dai. Pitost con do-mam no fumo pù. Me rangio sol co na mam.