No l’avré mia zà comprà el libro, vero? – Di Cornelio Galas
Ah, no vòi de zerto far la reclam al noss libro... ghe mancherìa alter. Ma el s'entitola «Modi de dir en trentim». V'ho avisàdi
![image](https://www.ladigetto.it/files.php?file=Rubriche/Galas_320_397235946.jpg)
No so se gavé fat caso. Ma en Itaglia (sì, col gl) zamài l'è pù quei che scrive libri de quei che li léze.
E alora te vedi, dapertùt, sui giornai, sui compiùter, en televisióm, 'sti pòri autori che par che i dìga:
«Dài, per piazér, crompéme el me libro, se no ghe rimeto soldi oltre al temp butà via per scriverlo.»
Bém, en libro, mì e 'l Guido, el capo de l'Adigét, l'avém anca fat per quel. Ensèma.
E l'è zà en giro en le librerie del Trentim.
L'è sui modi de dir en trentìm. Vèci e novi. Senza censure. Senza ensòma la ramàda fina che ferma le parole che pòl parér... brute, ofensive.
E che envéze zamài i dròpa tuti senza tant rispèt.
Oh, no l'è che vòi far la reclam de 'sto libro neh. Ghe macherìa alter... L'è sol per spiegàr 'n po' come l'è nat. Ensoma quela che l'è so màre.
En po' de modi de dir i gavévo mì. Altri 'l li gavéva el Guido per via de so pàre.
Fato sta che i avém messi ensèma. E sem arivai a squasi quatromili frasi. E che a 'n zerto punto ne sém anca fermài neh. Se no 'l gavrìa fat concorenza ala tor de babele.
Zà, perchè gh'è dénter en po' de tut. Miscioti de dialeti trentini. Da Trent ala Busa de l'Alto Garda.
E chì me sa che ariverà prima o dopo quei che fa la pónta ai bìgoi.
Ensoma, i studiai, i lezùi che i gavrà da che dir sui azénti, su zerti modi de dropàr i verbi.
Ma se ciàva. Mi vègno dala scòla dela tradizióm orale. Cioè dal dialèt parlà pù che scrit.
Perché quando me papà Italo, marangóm, el me diséva de spazàr le bosìe en falegnameria de zert no 'l voléva dirme de butar fòra tute le robe false da quel capanóm.
E no 'l me diséva de méter l'azento sula ì. No gh'era gnent che se podéva dir trane: «Papà, ma dopo le méto nei sachéti?»
Eco, i modi de dir i è nàti, per mi almem, da bocia. No te te domandévi cossa voleva dir quel «Vèi chì valà». No l'era n'ordine sbaglià o confuso. Te dovévi nar lì e basta. El valà l'era en de pù.
Sì, va bem, ma me sto embroiàndo da per mi. No, no vòi far la reclam del libro, ho dit. Perché se um el vol cromparlo 'l lo crompa. Se no 'l ghe enteresa... 'l lo làssa lì sui scafài de la libreria.
No l'è miga come i libri de scòla che bisognéva crompar... E dove noi, che a casa parlévem dialèt e 'n classe emparévem ìl tagliàm, no capìvem perche soto la «I» sula lavagna, gh'era scrit «Imbuto».
Quando envéze per noi l'imbuto, ensoma quel coso disegnà, l'era l'orèl. «O» semai, come «Orèl» no?
Oh, el Guido el m'ha dit de scriver quel che vòi. L'è anca en trapolóm questo. Come quando el pòr Péro Agostini, diretor de l'Adige, el me diséva, prima de darme da far en servizio emportante:
«Oh, Cornelio, me fido de la to enteligenza...».
E l'èra dura a quel punto. Perché fidarse dela nòssa enteligenza dele volte... te fa vegnìr dalbòm la cagarèla.
Nel libro – ma no sóm miga drìo a far la reclam neh – se 'l crompé, troveré anca dei modi de dir... en po', come dir, en po'... for dale regole, eco.
Ma, come l'ha scrit el Guido, per esempi «dàr del mona a qualchedum no l'è propri n'ofésa dai».
Per do motivi. El prim: no te ’l mandi po' en den posto tipo l'inferno o nela busa dela grassa (letame) neh...
El secont: ani fa (ero en pretura a Riva, per l'Adige) en consiglier del comum de Nago-Torbole, l'era finì nei gazèri perché el gavéva dat del mona al sindaco.
Bem, grazie anca a na ricerca che aveva fat el so avocato difensor (me par el Renato Ballardini, no volerìa sbagliarme) l'è stà asolto.
Perché? Perché nela parlada veneta e anca trentina, mandar en mona l'è zamài da temp en modo de dir... squasi amichevole, squasi da scherzo al bar.
Ma valà móna, che no te capissi gnènt. Ma set anca mona? Ma vèi chi mona, valà, che ne fém n'altro bianco e che la sposa la spéta...
E come sto modo de dir, disente sdoganà, ghe n'è tanti altri.
Bom, che dirve, se gavé la spùza soto el nas sto chi no l'è propri en libro da crompar.
Se no volè passàr per quei che lèze libri dal pit... lassè star.
Eco, ve consiglio magari l'ultim libro del Bruno Vespa pitòst. N'altro che no fa el reclam dei libri che scrive.
Entant bom Nadàl, bone feste. Ah, per le enformaziom serie sul libro domandéghe al Guido o vardé su l'Adigét.
Ma no sté dirghe al Guido che ve l'ho dit mi neh... No me piàs far reclam dei libri. Propri no no ghe la fago...
Invia il tuo commento![comment](https://www.ladigetto.it/themes/adigetto/img/comment_icon.gif)