Ma... gavrònte ciapà el còvid? – Di Cornelio Galas
Putèi, ve prego: lasséme star chì en pàze, che almém mòro polsà…!
![image](https://www.ladigetto.it/files.php?file=Rubriche/Galas_320_397235946.jpg)
Te scomìnzi a pensarghe quando la gózza al nàs la resta per pù dele solite do stimàne.
Zà, perché l'è da quando ero bocia che i me l'ha spiegà: el rafredór se t'el trascuri el dura dó stimàne, se t'el curi en quatòrdese dì te te la cavi. En pù st'am, dopo ani che propri l'era l'ultim dei me penséri, quando el me dotór el m'ha mandà per mèil l'apuntamento per la puntura contro l'influenza. Come dir, de colp me som sentù vecio.
O come i scrive sui giornai: categoria a riscio. Massì, me sóm dìt, dài che ne fém spónzer.
Com'èla come no èla, da quel dì no la và pù bem. Mal de òssi, nàs strupà, la testa che la pésa come en maròch, vòia de nar fòr dal lèt... che te prego, lasséme chì che almém mòro polsà.
Ensoma, no la va, no la va e no la va, diàolpòrco.
Entant en giro gh'è en concerto de zènt che scaìna. Che no rièsse gnanca a farte i auguri senza tosìr tra «bom nadàl» e... «anca ai tói a casa neh».
E po' che i te conta tute le so magagne:
«Mai stà 'sì mal en de sta stagióm. E po' quela féver lezéra ma che rote le bale. Te tòi zó la tachipirina, le caramele per la gola, el siròpo per la tós. Te sudi come... come quei che suda tant. E po' te senti i sgrìsoi zó per la schéna.
Ah, ma no l'è finìa. Perché te senti che tanti de quei che gà ste brute robe entorno i ha fat el tampóm per el còvid.
E oscia è vegnù fòra che i ha binà enséma propri quel mal che miga sècoi endrìo neh el n'ha fàt tant tribolàr.
«E anca dopo che 'l te passa, sto covìd, no l'è che staghi meio sat...»
Ma cramento, me digo da per mì, alora le vacinaziom fate a so temp no èle servìe en balóm?
Mi n'ho fat trée. Ho saltà la quarta perché co la terza puntura me paréva de star mal come dopo quela fata a so temp soto naja. Ancòi i zoveni no i lo sa, ma col vacino dela naja te stavi mal come en móna per tre dì.
Tutmal me fiòl, a Pisa, 'l l'ha binà sto covid. E anca la so morosa.
Adès no l'è che 'l stàga meio. Ma el dìs che 'l stéva meio prima però...
'Sa fénte? Ne sém vardài nei oci, mi e la me spósa. E zò en farmacia a crompar ste scatoléte con denter el coso da méter nele recie, quel dove mizàrlo e 'l tochét de plastica che se vèi fòra do righe rosse... te sei ciavà.
Gnente.
Dopo aver lèt cola lènt le istruziom (i podéva anca scriverle pù picole, ziocàn), dopo aver brigà tra le pétole del nàs... gnente. Sol na riga rossa.
Che vol dir che te sei negativo, cioé no, no te gài el còvid. Perché anca chi le robe le và tute al revèrs: no per dir sì. Positivo per dir no, no te sei a posto. To’ dài, vei chi valà.
E però no la và l'istéss...
«Set sicur de aver crompà i tampóni giusti? De aver fat come i gh'era scrìt?»
La spósa la tàca via la rumba: «Perché te fai sèmper le robe ala lizéra, su ste malatie chi no se scherza, bisogna star atenti... Forsi l'è meio che crompénte altri tamponi.»
E via cosìta per tuta la matina e anca dopodisnar...
Entant gò ancora la gózza al nas, la tós, mal de testa, fadìgo a respirar...
«L'è perché te fùmi massa.»
«Ma valà – ghe digo ala spósa – te sei anca tì nele me stésse stràze e t'hai sméss de fumar da en par de mesi zamai...»
El fatto l'è che de sto covid nòf (o èlo quel vecio che 'l s'è risveglià?) no parla pù nessum.
Ve ricordé no quando tuti i dì en televisiom i déva i... numeri. Tanti contagiai, tanti en ospedal, tanti morti...
Adès no i dìs pù gnènt. L’Adigeto.it l’ha domandà al Fero, ma no i g’ha respondù.
Eco sem passai dal massa al miga. En po' come suzéde co altre notizie.
Prima la guera en Ucraina... che la lassa el posto ala guera en Medio Oriente... che la lassa a so volta le prime pagine ala separazióm tra la Meloni e so marì... che dopo ariva quei che copa le done...
Se sa, ogni dì ghe n'è una nòva.
Però ne sém desmentegài prest de quando i pompieri i giréva co l'altoparlante per dirne de star serài en casa. I podéva anca dir «Si salvi chi può!», tanto…
Dele mascherine, del grìnpass, dei vigili che vegniva a domandarte le carte anca entant che te eri en pizeria... ensoma, quel de adès deve esser propri qualcòs de diverso dal covid vero se nei mercadini de Nadal te stenti a passar en méz ala zent.
E se nesuni se volta pù a vardar quel che starnudìs o 'l tossìs.
Massì, l'è en rafredoróm dai, cossa vòt che sia. Buta zó en biciér de lat calt con 'n góz (anca dói, se ciava) de sgnapa.
E te verài che...
Invia il tuo commento![comment](https://www.ladigetto.it/themes/adigetto/img/comment_icon.gif)