Entant che se spèta de entràr dal dotór – Di Cornelio Galas

El dotór: «Capìselo che el g’ha problemi ala pròstata?» – El paziente: «Capir capiso, l’è pisar che no piso»

Se sa, no l'è pù come na volta, quando el dotor del paés, se te gavévi qualcos, el vegnìva a to cà... per darte n'ociàda. Che po' el se ferméva a parlar del pù e del mém. Tra 'n café corèto e na sgnàpa.
Propri lù, che magari el t'aveva dìt poch prima de no esageràr coi biciéri.
No, adès, en zerti posti, anca en Trentim, così almém lézo, no gh'è pù gnanca i dotori… Come se ciàmei ancoi?, de base. Gnanca a noltiplicar sta base per l'altéza, frato doi.
E alora, soratut noi pensionài, ne trovém sèmper en quei locali streti, su caréghe de plastica, 'spetando che vegna el to numer, come quando te sèi dove i te taia zò salami e persùt al supermercà.
 
E l'è lì, su quele careghe scomode diàolpòrco, che t'en senti de tuti i colori.
A partir dala solita batùa de quel che vòl far rider (per no piànzer):
«El rafredór? Se te tòi zó le medizine el dura do stimàne. Se te fài finta de no gavérlo, se no te te curi... quatòrdese dì.»
Pò gh'è quel che veciòt 'l fa el figo:
«Ah, l'è stà me neó a ensegnarme come nar su gùghel col compiuter, per capir subit quel che me fa mal. Vegno chì dal dotor sol perché ghe toca a lù firmarme le le rizète dele medizine da tor zò. Se no podrìa anca rangiarme neh...».
 
N'alter envéze el taca via a parlar, co na strana nenia, de quei de la so età che zamai adés i è al zimitèri...
«Varda che 'l Gino, no l'ha mai fumà, no l'ha mai bevù en biciér de massa, el neva semper per fonghi e anca a balar ale sagre... Gnent da far, i l'ha més zó l'alter dì.
«Te vedéssi quanta zent... No avrìa mai dit che i lo conossés 'sì tanti. Anca perché per ani l'è stà per so cont su en malga.
«E 'l Péro? En bonèra de om. Cascà dale scale. El s'è rot el femore. Eh, caro mio, quando ala nossa età te se róte el femore, te gài zà en pé (quel sàm) de là...^
 
Entant vèi fòra dal dotor el Giani:
«Varda se devo perder temp per trovarme nele istesse condiziom de prima... Ghe l'ho dìt che ste medizìne le me guarìs dal mal de testa ma le me fa nar a cagar ogni minuti, cramento...”.
«Ma sì – dìs la Agnese che la gà el numer dopo de mi – anca lori i te dà zèrte medizine perché i ghe guadagna sóra qualcos no... L'è semper stàda cosìta».
Propri en quéla gh'è un co la cravàta, la giaca e na borsa en mam che 'l salta su e 'l dìs:
«Guardi signora che io sono un informatore in questo settore e le posso assicurare che...»
N'alter el ghe sùpa la bóca:
«Sì, dai, te sei en rapresentante de medizine, vòt che no sia el dotor a decider se fàrle vender o no?»
 
Tàca via en casìm. Tra quei che dìs na roba e quei che dis l'incontràri.
Ale tante um el scomìnzia a parlar de la so prostata. Che ghe tocherà zamài meterse el panolóm se 'l va en giro. «Perché, oscia, me scapa semper da pisàr...».
Ghe risponde um che pàr pù zovem: «Eh caro, per la prostata gh'è sol na roba da far... E t'el sai anca tì dai...».
El ghe fa anca l'ociolìm, entant che la siora la lo varda de sbiéch.
 
Eh, entant le ore le pàssa.
«Ma l'è da mezóra che l'è denter. Cossa ghe stàl contando, tuta la so vita da quando l'era bocia?»
Vèi denter ne l'ambulatori en siór co le stampèle: «Scuséme, savé se gh'è ancoi el dotor dei òssi?»
I lo varda tuti come se l'avés domandà na roba che no stà né en ziél né en tèra.
L'Ilio (névem enséma ale elementàri) el me fa:
«Tèi Cornelio, ch'en dìsit ne nar farne na càndola al bar, chì vizim, dela Rita? Che tanto chi me sa che vei mezdì se non l'una de dopodisnar prima che i ne faga nar denter...»
Fago do conti, vardo l'orolòi, e dopo:
«Ma sì valà, tanto de qualcos bisogna pur morir no? Fém come quel che l'è nà dal dotor perché el gaveva mal al fegato.
El dotor el l'ha visità e 'l gà dit: guardi che ha il fegato bruciato.
E lù: «Strano, l'ho semper tegnù bagnà col vim...»