Quando se svizìna le elezióm – Di Cornelio Galas

Come che el dìs el Guido, «No sté a scoltar i potitizi en campagna elettoral: podrése pensar de esser le persone pù inteligenti del mondo»

Disénte che me par sia cambià ben pòch (a parte i arnési che se dròpa), quando s'è zamài denór ale elezióm. Come adès en Trentim, per le provinzàli.
E 'l digo perché de elezióm, dal '75 al 2013, n'ho ciapà (e anca dàt) na sgiónfa, sul giornàl.
Gh'è semper - e me fa ancora pecà per i ex coleghi - come dir? Dei momenti che và drìo mam, semper co le itesse regole.

El prim l'è quei mesi (anca tanti) prima, dove no se sa ancora se se candida el Tizio, el Caio e quel'alter.
Ma soratut en quala lista. E tra l'alter no l'è che se è sicuri fim a l'ultim.
Basta vardar quel che, da 'n dì a l'alter l'ha dovù, propri en 'sto ultim moment, cambiar i so «santini» (zà fati neh) perché el gà pensa su: no, me candido co st'alter partito, oscia. (Vedi la nota del Guido a pIé di pagina).
 
L'è tutmal propri nel prim moment che vèi fora amizi e nemizi denter i vari partiti. Che no te avréssi mai dit che quel lì no 'l fussa pù amico de quel che adés el vede come el fum nei loci.
Semper en sto prim moment – e no l'è mai colpa del calt e gnanca de la monàda de l'autocombustiom – gh'è anca quei che vei «brusàdi».
Ensoma i buta fòra i nomi aposta per dir che no i va bem...
Se passa dopo ale aleanze. Cioè a contar quali liste le è d'acordi per far nar su el tal presidente.

E chì me vèi en ment en spetàcol del por Dario Fo che avevo vist a Bolzam. L'era sol lu, el Dario, sul palco ma co la so bravura anca de mimo el te féva enmaginar che ghe fùssa tanti politizi. Che quando ariveva el dì meterse d'acordo per nar ale eleziom, i se sposteva en po' da na banda, po' da l'altra, fasèndo anca le finte... per dopo lasàr el posto che i gavéva prima drìo la schena de altri.
Modi de moverse come... i guìndoi, ensoma.
 
Ala fim se ariva a... dormir davanti al posto dove bisogna firmar e lassàr le liste e i sìmboi.
El prim che ariva ciàpa el posto pù bel? Mah, sarà. Tanto l'è quei pòri scagnòzi che stà lì co la cuerta anca de not. Se ciava.
Mi de zert no ho mai votà el prim dela scheda sol perché l’era el primo dela scheda.
Così come no l'è stà nela gabina eletorale che me som mes a vardar quel e soratut dove el gh'era su.
 
Eco, el moment pù bel però l'è quel che è scominzià en ste stimàne. Cioé le presentaziom de candidài e programi.
E chì me vèi en ment quel che avevo provà a far en par de volte (po' ho lassà perder, no ne valeva la pena). E cioè le tavole sinotiche.
Cossa èle? L'è en pratica tirar righe en via e 'n zò. Enzima se mete i vari temi: anziani, giovani, industria, ambiente, quel che volè voi.
E soto, come en d'en schena, quel che propone su anziani, giovani ecc, i vari partiti. Beh, no me crederé ma vegnìva squasi da dir che i me tolésse en giro.
 
Perché squasi tuti i partiti i diséva bem o mal le istesse robe. Magari senza nar tant nei particolari per pararse el cul.
Ensoma tanti i se la caveva co le solite (e gualive) parole: «Massima attenzione ai problemi degli anziani», «Massima attenzione ai problemi dei giovani», «Massima attenzione ai problemi dell'ambiente».
Beh dele volte qualcòs i cambiéva: «Grande impegno per i problemi dell'industria», «Estrema disponibilità nei confronti della comunità».
E su tut, no gh'era zeròti: «Rispetto dell'autonomia trentina».
 
No ho fat le tavole sinotiche st'am. Ma se né sul me sito de Televignole e zerché elezioni provinciali 2013, troverè tut quel che è stà scrit sui giornai alora e anca me interviste a quei candidài.
Se al posto de l'uno ghe metéssa el dó, e quindi fés finta che quele le fussa dichiaraziom de st'am, me sa che... ma forse me sbàlio.
Del rest, semper al giornal, ho fàt tanti de quei che i ghe ciama «forum».
Sol per le comunali. Però l'era bel veder tuti sti candidài (a sindaco) sentài vizini che i stéva atenti a no pisàr for dal vaso.
Perché, quando tochéva ala zent far le domande, se no stéva sule sue, podeva arivar el can da l'ua de turno che 'l te féva far bruta figura.
 
Per esempi se zinque ani prima te avévi promes el marciapiede a Caneve e adés t'el prometevi de nof... ah caro mio, te finìvi en cros.
Ma na figura de merda l'ho fata anca mi. En d'en intervista avevo scrit che el candidà l'era en vulcano in «erezione» enveze che en «eruzione».
Beh, quale sera el candidà el s'è ciapà n'aplauso da tute le done.
E dopo al bar del Casinò de Arco, el m'ha anca pagà da bever. Per dir...