L'è tut en dàmela tòmela... – Di Cornelio Galas

La guèra (la manovra, valà) l’ha separà quei che prodùs le materie prime da quei che i le lavora. Per carità, torném ala globalizazióm. E sciào.

Gh'è tante robe che no capìsso, no sol da algéri per la verità, su quel che suzéde nel mondo.
Ancor prima che vegnìs la rogna del covid, per capirne. Perché paréva, e par ancora, che su sta tèra nés (e vaga ancora) tut bem fim quando gh'era (e 'l gh'è ancora) quel che i ghe ciameva e i ghe ciama «mercato globale» en taliàm.
Tut en magna magna, per dirla alla nòssa.
 
Eco, de colp, prima col covid e adès co la guèra (scuséme, bisogna dir co l'operaziom speciale, se no i russi i me scancela da... tut anca da l'Adigetto.it) è saltà tut per aria.
Ve ricordé quando no se troveva l'amuchina, le mascherine, i guanti... gnanca a pagarli oro? Eco, adès quele robe lì le gh'è.
Manca però i soldi perché è aumentà tut el rest.
E no parlo sol dela benzina, dei panéti, ma anca e soratut del gas (con boléte d'èn mes che na volta le costéva sì tant sol coi conguai de fim inverno).
 
Ma ném subit al ciòdo dela questiom. Come l'ha scrit su Feisbuch qualche dì endrìo el me diretor Guido (posìbile che nesum altro giornalista el se sia scòrt de sta roba strana?) i russi i s'è encazài perché i ucraini i avrià bombardà, coi so elicoteri (tra l'alter precisi identici a quei dei russi) en deposito de carburanti... en Russia.
«Eh, no – i ha dit i russi – se fé cosìta vol dir che volé vegnir a far casini anca denter el “nòs”. No se fa così. La vòssa l'è na envasióm. Farem i conti quando ne senterem de nof al tavol per far la paze...»
 .
Al che, el Guido, l'ha endrizà le recie: «Ma come? Quela de la Russia no èla n'envasióm? E alora cosa se spetévei? Che i altri i stés lì sol a ciapàrle e a star atenti o na butar bombe de là?»
Ma sta chì l'è sol una de tante robe che no capìsso.
Aòl de là del fatto, per esempi, che la Russia, prima de la fim de febrèr, la parléva sol de esercitaziom sul confim de l'ucraina.
E che - anca dopo aver butà zó case, ospedài, orfanotrofi, e tut quel che se podéva spacar su e copà perfim bociéti malài – no i ha mai dit de aver envaso l'Ucraina.
 
E gnanca adés par che i ghe ciàma guèra, envasióm a quel che i sta fasendo.
E, seitando a ciapàr en mam le robe che no capìsso: el capo dei turchi par che sia el pù lavorientóm per arivar ala pàze. Anca se no è passà tanti ani da quela volta che no 'l gà dàt gnanca la caréga da sentarse ala Ursula capa de l'Europa.
Ma soratùt – domando – no èlo lu che el gà vendù ai ucraini i droni che i sta ancora dropando?
 
Per no parlar de l'America. Che la ghe stà vendendo i carrarmati (crompai da la Russia o tutmal fati en quel posto?) a Zelenschi.
Così come – zà dit – i elicoteri dei ucraini e dei russi i vèi dala stessa fabrica.
Eco quel che volevo dir: el «mercato globale» zamai el ne stà zamai entorno.
Ma – scuseme la barzeleta, ma l'è per capirne meio – l'è come la scìmia, la bàla, la ciùca.
Fim che te la gài entorno l'è gnent. L'è quando la tei endòs (la scimia) che l'è en casim.
 
Così come el gàs che ciapém dai russi. E che paghem ogni dì tanti soldi. E con quei soldi la Russia po' la bombarda l'Ucraina. Capì come?
Ah sì, me desmenteghevo, adès el Putin el vol pagamenti en rubli. E i ha zà trovà la gàbola. Ariva el gas, l'Europa la paga en euro. I euri i va su en cont. Pò i vèi voltài en rubli e i torna sul cont de l'Europa che così la pol pagar en rubli.
Ma dopo en giro che ades fa sol i mafiosi quando i vol «netàr» i soldi ciapài co la droga.
 
E dopo vegnirà la questiom de la farina, anca se vedo en televisiom ancora la reclam de quei che fa ciopéte «sol con gràm taliam» anca se magari el vei da ani da l'Ucraina.
Così come da la Cina vèi i pomodorini...
Ensoma, la guèra (oscia, la manovra) l’ha separà quei che prodùs le materie prime da quei che i le lavora.
Per carità, torném ala globalizazióm. E sciào.