Cosa avém emparà en sto més... – Di Cornelio Galas

Ve lamenté che l'Italia del balóm no la va ai Mondiali? Sarìa come se su na nave che la va font um el disés al comandante che se vede mal la televisióm...

Ogni dì gh'è qualcòs da 'mparàr. Adès po', co le televisióm e i compiuter denter i telefonini, bisognerìa dìr che ogni minut te n'empàri una de nòve. Prima col covid. Dove avém tuti capì, a so temp, cossa vol dir quela parola en inglés: lochdàun, col en tèra». Pù tut quel che i n'ha spiegà quei pù lezùi e studiài su sta pandemia (altra scoperta) che l'è pu granda de l'epidemia... perché no l'è sol mia ma anca tua e de quei altri.
 
Bem. Adès, co la guèra en Ucraina, entant – en tanti – savém... dove che l'è sto paesóm grant do volte la Francia.
E dì dopo dì sem deventài pu inteligenti en geografia: Chief, Mariupol, Odessa, Cherson, Leopoli (scrivo come voi, come parlo se sa), el Donbàss (che deve essere la parte bassa del Don…), Zaporiza (dove gh'è la centrale nucleare pu granda de l'Europa), Ciernobil (dov’è che l’avén zà sentìa nominar…?), po' el mar de Azof en bas a destra, la Bielorussia de sora, la Moldavia (e la Transnistria zamai meza russa).
Ensoma, ne sém fati – e stem fasèndo tuti i dì – na bela ripassada de quei posti. Che prima – disénte la verità – no conossévem sì bem, dài.
 
Sèmper en sto més de guera, avém capì anca tante altre robe. Per esempi che en tute le storie, bele e brute, gh'è na «narrazióm» (nome che i dropa zamai tuti quando no i sa pù cosa dir).
E che gh'è anca i «né né», che no l'è quei che nina i bocéti pena nati, ma quei che no sta né da na banda né da l'altra.
Ah, gh'è anca quei che ala fim dei so discorsi, quando i se trova n'atimim embroiài, i dìs: «Fermi tuti, bisogna capir bem che gh'è n'aggredito e n'aggressór. Cioè un che mena e n'altro che le ciapa.
 
Per po' spiegar che no podém far de pù per i ucraini che en dì sì e l'altro anca i se trova soto le bombe.
Sì, ghe mandém via da magnar, medizine, tende, armi («da difesa, se sa ben…) e ghe dém na mam a quei che scampa dala guera.
Ma dirghe a Putin che el sèra pura i so rubineti del gas... No oscia, se no ném tuti dal balóm su drit.
E alora ghe dém (semper al Putin) en miliardo de dolari (o euro) al dì... che lù ades el volerìa adiritura en rubli.
Che noi i rubli dovréssem crompar tut mal da lù dandoghe dolari o euri.
 
Sì, en dàmela-tòmela che ne lassa né fodrài né embastidi. E soratut lassa tranquilo el capo dei russi anca se i ghe porta via la nave granda che el gà da qualche banda...
Eco, avém emparà che a forza de far afari con tut el mondo se qualchedum dà fòr da mat de colp sem ne la situaziom de quel che el voleria ma nol pòl pù de quéla de quel che el poderìa ma no 'l vol.

Ensoma, mam ligàe. E ciao Ninéta.
Sperando che qualche dì (quando? Prima o dopo Pasqua? O sente ancora lontanoti?) i se meta d'acordi. Che qualchedum (el Zeleschi?) el mòla qualcos. Che a que l'alter el ghe basta.
Ma soratut che no vegna fòra altri casini pu grandi.
Basta che en ràzzo el vaga nel cùl sbaià... magari a quei de la Nato… basta che ghe sia bombe piene de merda e... ciao fighi.
 
Come disé? Che l'Italia del balóm l'èi restàda fora dai mondiali?
Scuséme ma sarìa come se su na nave che va font um el vegnìs a dirghe al comandante che ne la so gabina se vede mal la televisióm...