Putòst che gnènt... meio putòst? – Di Cornelio Galas

Per dirla en rima: «Prima per el covid, adès per la guèra/ sém de nòf col cul per tèra»

Benzina e diesel a do euri e passa. Robe che se te fài el pieno te rìsci davéra de lassàrghe lì… la machina come cauzióm. Entànt che te vài a vardàr se te gài sul bancomat i soldi per pagar.
Boléte del gàs che par te abia scaldà la casa per stimàne a manéta ma co le porte e le finestre averte, spalancàe.
Quei che fa el pàm che te dìs: «Squasi me convegnerìa smorzàr el forno: Perché come l'empìzo som za en debit».
E piam pianim narà en su (mai en zó) i prèzi de tut quel che - ma varda tì - bem o mal te crompi tuti i dì. Quel che te serve, diàolpòrco.
 
Ensoma, prima per el covid, adès per la guera, sem de nòf col cul per tera.
E no te pòi gnanca tòrtela pù de tant. Perché, cramento, gh'è dal bom zènt che sta pù mal, pù tant mal de ti, gnanca tant lontàm.
Tant per darne n'altra martelàda séca en testa, se parla anca de bombe atomiche, de rubinéti che qualchedum podrìa serar, de tanta pora zènt che scàpa dala guera.
Al che, te te dìsi da per ti: «Dài, che tutmal a noi la ne và ancora bem... De cossa dovréssen lamentarne?»
 
Disénte che no sem abituai (come i nòssi nonni) ala guèra, ala fàm, ala sé, a bombe che gira sora le case.
E alora sacramentém davanti ai distribudori de benzina.
Perché no capim come mai, de colp, sem finidi en sta bruta situaziom.
«No bastévelo el covid? Ah, adès no serve pu gnanca el grìn pass? Pecà che sia meio tegnir la machina en garàs e nar a peoti se no se vol finir i soldi tre dì dopo aver ciapà la paga.»
 
Ma sém ancora fortunai. Perché el governo l'ha subit ciapà en mam sta situaziom. E l'ha sbassà de 25 zentesimi le so tasse sula benzina.
Podével far de pù come dis tante organizazióm? Disénte che ala fim no l'ha fat alter che spostar da na banda i soldi che el ciapéva (co l'Iva en pù) da l'altra.
En dàmela tòmela, ensoma. Putòst che gnént... meio putòst, come se dis.
Ma quela no l'è so mare. Me domando, per esempi, come mai el ministro Cingolani (cognome che, scuséme, el me fa pensar... ai carrarmati) quel che dovrìa portarne vers i mulini a vent, i panèi sui cuèrti e altri modi per far nar i motori (e anche le centrali dela corente), eco me domano, come mai sto ministro l'ha subit parlà de na «colossola truffa dei speculatori».
Forsi el sa robe che noi no podém saver? E se te le sai, adès, sol adès, te mandi la finanza a controlàr?
 
N'altra roba che no me torna: gas, benzina, gasolio, èi arivai nei serbatoi quando era zà aumentà i prezi o prima? Ensoma, gài fat la grésta?
E sol ades savém che se la Russia la sèra i tubi del gas tra i pù embroiài ghe sém propri noi taliani?
 
No la vedo bem. Anca per el fatto che tra le accise gh'è ancora quéla de la guerra en Abissinia... ’na guerra finìa da 'n pèz, ma che paghém ancora ogni volta che averzém el stupàl del serbatoio.
Per el rest che ve diga, se serve, starém a cà, anca al frét e 'mpizrém la fornèla per meter su la moka del cafè, come se féva sti ani.
Farém musìna, se se podrà farla.
En paròl de polenta, na stagnàda e tuti a tocàr el stocafìss co 'n tochét de pam.
Sperando che 'n dì vegna sul bachetòm quel...o quei che ha envià via tuta sta bruta storia.