I vazìni de 'na vòlta, quei sì! – Di Cornelio Galas

Na volta no gh'era da discuter sule vazinazióm... no gh'era propri mal de bale

No so se a voi suzéde la istessa storia, ma a mi da pù de na stimàda zamai (volevo dìr da l'am passà ma no l'è bel far batùe su ste robe chi) me dà squasi fastìdi veder tut el dì en televisióm zént che se fa sbusàr i bràzi col vazìm contro el covid. No, no sóm contro i vazìni, ghe mancherìa cramento, ma ala fìm pae demò che sia na roba for del normale quel che envéze me sa che dovrìa esser fat da tuti senza tant pensarghe su.
 
E chì me vèi en ment i vazìni de quando ero putelòt. Disénte ani sesanta. Quando miga tuti gavéva la televisióm en cà.
Che se ne néva a l'albergo Catoi (dala Pierina) a Vignole per vardàr ensèma quel poch che gh'era.
Quando de zert no i parléva tut el dì de vaiolo, poliomelite, varizèla e altri bruti malàni de quei ani.
 
Sol che, ogni tant, dale elementari de Bolignàm, i ne portéva (me pàr a pè, miga col pulmìm) zò denòr ai pompieri de Arco, ala poliambulanza, dove el por dotor Marcheseli el te sponzéva el bràz. E sul bràz te vegnìva dopo le famose varòle... che en qualche modo le gò ancora.
L'è na specie de zicatrìze, come i t'avés fàt en taiét.
Tut màl se dovéva farlo tuti: l'ùcia, na fregada co l'alcol, en zerotìm e avanti n'alter.
 
Pù bela la vazinazióm (no sté domandarme contro cossa perché no me ricordo) col dadét de zùcher. I ghe metéva sora na roba rossa (o erela blu?) e zò che 'l vaga, anca se te restéva en boca qualcos de strano.
Ensoma, no l'era en ciocolatìm. Ma del rest no 'l gavéva gnanca el saor de le foie madri, o, a proposit de ciocolatini, de quei che... i dropéva per farte nar de corp.
Gh'era anca quei che i ghe ciaméva vermifughi, cioé sì amari e catìvi, che gnanca i virus i li soportéva.
 
L'era àni che te vegnìva dal bom el schechèo se te dovevi nar dal dotor o pèzo dal dentista.
Me ricordo 'na volta, che m'ero taià co la fàlz vizim al dinòcio. Miga i m'ha portà a l'ospedal.
È vegnù a cà el por dotor Colini. L'ha vist che tremévo come na fòia. E alora el gà dit ai méi:
«Basta na garza nèta, e na medicaziom al dì, no, no serve dar pònti.»
E difati quela zicatrize longa dodese zentimetri la me ricorda ancora quel fàlz.
 
Semper el dotor Colini, che 'l féva anca el dentista, pù de na volta el m'ha cavà denti senza darme gnent per no sentir màl.
T'el sentìvi che 'l néva denter en bòca, che 'l ruschéva e po'... na sensaziom come se i te sbreghéssa qualcòs vizim ala lengua. En màl boia.
Po' el dotor el ghe diséva a me pàre: «Dài, vaghe a crompar en gelato che così se ferma el sangue».
E l'era l'unica felizità de quel dì.
 
Ma me ricordo anca n'altra volta, quando, nàndo sul solèr, dove en d'en sgabuzìm, sonévo la chitara, sicome era saltà la luce, ho ciapà la stràa sbagliada e som vegnù zò drit, per sei-sete metri ciapando na scalcagnada da paura.
En qualche maniera ero riussì a vegnir fòra da quel locale al piamterrém dela falegnameria de me papà.
Ghe l'avevo fata anca a averzeme el portom, a nàr nel piazàl.
Me papà che l'era cazadòr, avendo sentì sto casìm de soto, l'era zà pront sul pontesel col «dodese».
E meno mal che me pora mama la gà dìt: «Varda che l'è el Cornelio lì per tera». Se no adés podrìa anca esserghe el me nome sula tomba de la faméa.
 
Bèm, anca quela volta è arivà el dotor Colini.
El m'ha tastà la schéna. El m'ha dit: «En do dì te sei fòr dal let». Altro che lastre e tac.
Ma perché ve conto ste robe? Perché me par che na volta no gh'era tant da discuter sule vazinazióm, ma gnanca su quel che diséva i dotori.
L'era quela la verità. El rest? Sol tante monàe.