Qualche drìta a quel ch'ha vint quei milioni – Di Cornelio Galas

Volé investir i soldi ciapài col super Enalot? Fé quel che volé, ma non sté a investir n’altro orso che traversa la strada

Prima de tut devo ringraziar el Guido, el diretor de l'Adigét. Da quando, per scherz, se sa, 'l m'ha scrit en Feisbuch fasendome i complimenti perché per lù saria sta mi quel che a Riva ha vint quei squasi novanta milioni (de euri) a l'Enalòt... beh, no so perché, ma gò de colp amizi e parenti en tut el mondo.
Beh, no som mì quel che el gà avù tut quel... culo.

Però, propri perché a so temp scrivevo sul giornàl, so come le và ste robe. Ensoma, conósso l'andazzo.
Tuti a càzza del nome (e cognome) del fortunà. Per far cossa? Sol per curiosità? Per darghe na pàca sula schéna e dirghe: «Brào, brào»?
Ma valà... E tutmal a quel che ha vint gavrìa qualche «drìta» da darghe.
E ala fìm ve spiegherò anca perché credo che sti consìli i sia tra quei pù giusti.
 
Entant en sti dì chì (disénte meio: per almem en mesàt) quel che ha zugà sti numeri fortunai el dovrìa propri far finta de gnent. E seitar a dirse:
«No è suzés gnent. Nem envanti col solito tram tranm.»
Quando no 'l gà nesuni entorno, meio ancora, serà dénter el cesso de so casa, el farà anca en controlim giust, stàifelo, a quela schedina fortunada.
No na volta sola: almem na zinquantina de volte. Bom. Fati sti esami, quando no gh'è pù dubi, se pòl ciamàr n'avocato o meio ancorea en notaio.
E meterse d'acordi per n'apuntamento su na roba che no deve nar fòra dei muri de l'ufìzi.
Anzi, se ghe fa firmar na carta a parte che se qualchedum el vei a saver del fatto per colpa de lori (anca de altri che lavora en quei ufizi neh) salta la parcèla...
 
Questo per nar al vers de quei che deve darte tuti quei soldi e ciapàr l'asegno, el bonifico, la cariola con tuta la monéda... che 'n sònte mi.
Dove meter tuti quei milioni? O meio, come dìs quei lezùi: 'n dove envestìrli?
Ocio che bisogna capirne su cosa vol dìr envestìr. Perché ieri (sàbo disnòve otóber) en prima pagina su l'Adige gh'era el titolo: «Orsi, nuovo investimento».
No vòl dir che quei de la Provincia i ha dropà dei soldi per crompar altri orsi (per carità, basta quei che gh'è). No, l'è che i ha ciapà sóto n'altro orsachiot su la stràa. Tuta n'altra roba.
Eco, alora nel caso del nos fortunà, no l'è che i soldi se deve butarli soto le machine che passa da Vezàm... no, bisogna trovar el modo de farli frutar.
Perché meterli soto el materàs e tirarne fòra pochi ala volta... Quando se va a tor el giornal, i zigareti, a magnar la pizza o crompar en nof par de scarpe... no l'è che sia el modo pù còmot e sicur.
 
E alora l'è el caso de farse dar na mam da quei che de ste robe i capìs de pù.
Zerto no i te dà consili en cambio de na gazósa, se sa. Ma se no se capìs gent de banche, azióm, borse (no quele dele done) alora l'è propri el caso de trovar n'esperto (o n'esperta) che soratut el sapia tegnir seràda la boca (e anca le recie) quando el deve taser e no scoltar.
Ma chi sem zamai oltra el mesàt passà né da fodrài né da embastidi.
Prima de arivar a contar i primi soldi, prima de emparar cosa rende de pù de quei milioni, l'è el caso de star calmi. E alora:
1.Guai se se crompa qualcos de pù de quel che se crompéva prima de aver vinzù a l'Enaloto.
2. Tegnir sempre i stessi vestiti, ensoma, quei che se gà en casa. No l'è el caso de cambiar... el lùùk, che 'n sònte, giaca e cravata quando s'è mgarai semper nàdi en giro coi gìns e 'l maionzìm sora la vecia camìsa.
3. Nar fòra a magnar come se féva prima. Na volta (forse) en stimana. E sol la solita piza, senza po' tanti dolzi o vim diverso da quel tapo corona. Anca le bire... quele a bom mercà, no speciali.
4. Seitar a lavorar senza domandar ferie o permessi, anzi, lavorar de pù, come se ghe fussa da pagar debiti en faméa.
5. Gnente spese per la casa o altro: questo almem per n'àm, meio dòi.
6. Tegnìr en cont che de quei 89 e passa milioni tanti i narà via subit per le tasse, quindi pensar sol su quei che resta no su quel che è scrit sui giornai e anca sul tabelòm del tabachìm dove avé zugà el bigliet giust.
7. Gavrè temp per farve n'idea de cossa far e cossa no fa, de cossa crompar e cossa no crompar. Entant lassè tut come l'è. A parte le banche o le Poste o quel che volè nesuni i savrà quanti soldi gavrè. E quei che lo sa i deve far zito, diaolporco, se no fè en modo che i vaga a laorar en... tanta mona.
 
Eco, ades ve spiego perché me par che sti consigli i sia giusti. Tanti ani fa, quando gh'era ancora la lira per dir, avevo scrit en d'en articol su l'Adige, propri ste robe dopo che um nela «Busa» l'aveva vint na paca de soldi co 'n biliét de la loteria dela Befana.
Bem, qualche dì dopo me ciàma en redaziom a Riva um che 'l dìs:
«Ciao Cornelio, grazie dele drite che te m'hai dat neh. Ades però no stà zercarme... som en mùa, come te m'hai dit de far.»
 
La zonta del Guido.
Un letore de l’Adiget.it l’ha scrit: «No se deve dar ste notizie, perché alimenté la ludopatia.»